Жаңа Конституция – еңбек адамының құқықтық кепілі

Еліміздің басты құжаты – Конституцияның жаңа жобасындағы еңбек құқығына қатысты нормалардың нығаюы қоғамда үлкен қолдауға ие болуда. Бұл өзгерістердің мәні тек терминологиялық жаңаруда емес, ол мемлекеттің әрбір азамат алдындағы әлеуметтік жауапкершілігін жаңа деңгейге көтереді. «Қазақстан темір жолы» ҰК» АҚ ұжымы Ата Заңдағы бұл жаңашылдықтарды еңбек адамының мәртебесін асқақтату деп біледі, деп хабарлайды Rail-news.kz.

Жаңа редакцияда бұрынғы «еңбек бостандығы» формуласының орнына «Еңбек құқығы» ұғымы нақтыланды. Бұл – Қазақстанның халықаралық стандарттарға, атап айтқанда, Экономикалық, әлеуметтік және мәдени құқықтар туралы халықаралық пактіге толық сәйкес келуін қамтамасыз етеді.

«Еңбек құқығы» терминіне баса назар аудару – мемлекеттің әлеуметтік-құқықтық кепілдіктерді өз мойнына алатынын білдіреді. Бұл тек жұмыс істеуге рұқсат беру ғана емес, сонымен қатар: Жұмыспен қамтуға тең қолжетімділік; Еңбек саласындағы кемсітушілікке жол бермеу; Жұмысқа орналасуға жәрдемдесу бойынша мемлекеттің оң міндеттемелерін орындау.

«ҚТЖ» ҰҚ» АҚ үшін еңбек құқығының конституциялық деңгейде нығаюы ерекше маңызға ие. Компания еліміздегі ең ірі жұмыс беруші ретінде мыңдаған теміржолшының құқығын қорғауды, қауіпсіз еңбек жағдайын жасауды және әлеуметтік пакеттерді қамтамасыз етуді басты басымдық деп санайды.

Конституцияда еңбек құқығының айқын көрсетілуі – әрбір теміржолшының ертеңгі күнге деген сенімін арттырады. Бұл нормалар біздің компаниядағы ұжымдық шарттардың құқықтық негізін одан әрі нығайтып, еңбек қатынастарының халықаралық стандарттар деңгейінде дамуына жол ашады.

Конституциялық терминологияның халықаралық стандарттарға жақындауы шарттық міндеттемелерді түсіндіруді жеңілдетіп, еңбек дауларының алдын алуға мүмкіндік береді. Бұл – Қазақстанның әлемдік деңгейдегі өркениетті еңбек нарығын қалыптастыруға деген нық қадамы.

Қорыта айтсақ «Қазақстан темір жолы» ұлттық компаниясы Жаңа Конституциядағы еңбек құқығына қатысты нормаларды толық қолдайды. Бұл өзгерістер еліміздің көлік-логистика саласында тер төгіп жүрген әрбір маманның құқықтық қорғалуын қамтамасыз етіп, әділетті Қазақстан құрудың берік негізі болмақ.