Меморандумға қол қойды

Қазақстан мен Қырғызстанды байланыстыратын шекаралық аудан Меркі станциясында Халықаралық теміржол кәсіподақтары конфедерациясының ұстанымына сай, қазақ-қырғыз теміржолшылар кәсіподақтарының достық, іскерлік байланысты нығайтуды көздеген ресми кездесуі өтті.

«Қазақстандық салалық теміржол көлігі қызметкерлерінің кәсіби одағы» ҚБ төрағасы Оразғали Ахметбаев пен «Қырғызпрофсож» төрағасы Талғат Жолдашев бастаған қазақ-қырғыз делегациясы өзара достық қарым-қатынас қағидаттарын негізге алған екі ел арасындағы кәсіподақтар ұйымының ынтымақтастығы аясында ұйым жұмысын үйлестіру және ұйымдастыруға қатысты мәселелерді талқыға салды.  

«Қазтеміржолкәсіп» ҚБ төрағасы Оразғали Ахметбаев екі елдің салалық кәсіподақтарының ынтымақтастығы – көршілес әрі бауырлас елдер арасындағы ежелгі достықты айқындай түсетінін, аралас-құралас жатқан екі елді байланыстырып жатқан ортақ шойын жолға қатысты мәселелерді бірлесе шешудің бірлескен келісімі екенін атап өтті. Қырғыз елі тарапынан Талғат Жолдашев та қазақстандық әріптесінің пікірін қуаттап, теміржолшылар кәсіподағының рөлі мен маңызы жайлы сөз қозғап, бұл көптен жоспарланған кездесу екенін жеткізді.  

Теміржол кәсіподақтарының ортақ мәселелерін қозғаған жиында сөз алған кәсіподақ өкілдері ұйым жұмысына қатысты мәселелерді талқыға салып, ортақ шешімін іздеумен қатар өзара тәжірибе алмасуға мүмкіндік алды.  

Жиын соңында қазаққырғыз теміржолшылары кәсіподағының төрағалары екі ел арасында ежелден қалыптасқан достық, іскерлік қарым-қатынасты айшықтайтын құжат шекара маңындағы ынтымақтастық туралы Меморандумға қол қойды.  

– Халықаралық теміржол кәсіподақтары конфедерациясының (МКПЖ) саясаты құрмет, теңдік, тату көршілік, жалпыға сәйкес әрекет етуге негізделген. Біз басшылыққа алған қағидат осы. Көршілес екі елдің тамыры тереңге тартқан тарихи байланысы мен достық қарым-қатынасын енді екі елдің теміржолшылар кәсіподақтарының шекаралас аймақтардағы ынтымақтастық туралы Меморандумы растай түспек. Екі елді байланыстырып тұрған Меркі станциясы орналасқан Жамбыл облысы Меркі ауданында қырғыз әріптестермен өткен бүгінгі басқосудың тарихи маңызы жоғары, – деген «Қазтеміржолкәсіп» ҚБ төрағасы Оразғали Төлепбекұлы кездесудің барлық жағынан жемісті болғанын атап өтті.