Қазақстан мен Пәкістан Солтүстік – Оңтүстік бағытында мультимодальды тасымалдарды дамыту туралы келісті
Қазақстан Республикасының Президенті Қ. К. Тоқаевтың Пәкістан Ислам Республикасына мемлекеттік сапары аясында «Қазақстан темір жолы» ҰК» АҚ («ҚТЖ» ҰК» АҚ) атынан «KTZ Express» АҚ және Пәкістанның National Logistics Corporation (NLC) мемлекеттік логистикалық компаниясы арасында Мультимодальды тасымалдауды дамыту саласындағы өзара түсіністік туралы меморандумға қол қойылды, деп хабарлайды Rail-news.kz.
Құжатқа қол қою Қазақстан мен Пәкістан арасындағы көліктік-логистикалық өзара іс-қимылды дамытудағы практикалық қадам болды және Солтүстік – Оңтүстік бағыттағы нарықтар арасында тұрақты жүк ағындарын қалыптастыруға бағытталған. Осы бағыттағы жүктердің әлеуетті номенклатурасын астық және оны қайта өңдеу өнімдері, көмір, тыңайтқыштар, металдар, химиялық өнімдер мен ағаш материалдары қалыптастырады.
Ынтымақтастық екі елдің инфрақұрылымдық және транзиттік мүмкіндіктерін кешенді пайдалануды, сондай-ақ кері жүктемені қамтамасыз ете отырып, көліктің әртүрлі түрлерінің қатысуымен мультимодальды логистикалық шешімдерді құруды көздейді, бұл бос жүрісті қысқартуға, маршруттарды оңтайландыруға және жиынтық логистикалық шығындарды азайтуға мүмкіндік береді.
Тұтастай алғанда, Меморандумға қол қою «ҚТЖ» ҰК» АҚ және NLC инфрақұрылымдық мүмкіндіктері мен логистикалық сараптамасын біріктіруге негізделген Қазақстан мен Пәкістанның ұзақмерзімді стратегиялық әріптестігін дамытуға деген ұмтылысын көрсетеді.