Теміржолшылар таңдау жасайды
"Қазақстан теміржолшысы" газетінің Жамбыл облысындағы меншікті тілшісі
15 наурыз – жексенбі күні Қазақстанда республикалық референдум өтеді. Елдің саяси өміріндегі маңызды оқиғаға теміржолшылар да үн қосып, өз таңдауын жасамақ.
Осы аптада «Әділетті және Прогрессивті Қазақстанның Халықтық Конституциясы үшін!» Жалпыұлттық Коалициясының және облыстық, Тараз қалалық штабының жетекшілері «ҚТЖ-Жүк тасымалы» ЖШС Жамбыл филиалының және Магистральдық желі бөлімшесі қызметкерлерімен кездесіп, тарихи сәтте азаматтық белсенділік танытуға шақырды.
Жиынды ашқан Жамбыл филиалының директоры Айдын Сеитбенбетов Коалиция мүшелерін таныстырып өтіп, шалғайдағы құрылымдық бөлімшелердің басшылары кездесуге онлай форматта қатысып отырғанын жеткізді. Сондай-ақ теміржолшылар конституциялық реформаның тарихи мәнін түсінетінін, республикалық референдумда азаматтық ұстанымдарын білдіруге дайын екеніне тоқталды.
Кездесуде Коалицияның облыстық және Тараз қалалық штабының жетекшілері Дауыл Бейсенқұлов пен Кенжебек Олжабай еліміздің ертеңіне бейжай қарамайтын еңбекқор жандардың үні әрқашан маңызды екенін атап өтті. Жаңа Конституцияда еңбексүйгіштік – қоғамның негізгі құндылықтарының бірі ретінде көрсетілгенін, бұл – жұмысшы мамандардың еңбегі мемлекет деңгейінде бағаланып, олардың құқықтары мен қауіпсіздігі заңмен қорғалатынын білдіретінін жеткізді.
Бұдан соң Коалиция мүшелері Жамбыл магистральдық желі бөлімшесі қызметкерлерімен де кездесу өткізді. Жалпы Жаңа Конституция жобасында еңбек ету құқығы, әділ еңбекақы алу, кемсітушілікке жол бермеу және өндірістегі қауіпсіздік – конституциялық кепілдікке айналатыны көрсетілген. Жұмыс орнындағы қауіпсіздік – тек жұмысшының ғана емес, мемлекеттің де жауапкершілігі болмақ.