Донор болу – сауапты іс

Қазақстандық теміржолшылар «Донор күні» акциясына белсенді атсалысып, сауапты істі жалғастыруда. Осы аптада ҚТЖ бас ғимаратына келген жылжымалы медициналық комплексте компанияның Адами ресурстарды басқару департаментінің ұйымдастыруымен 107 теміржолшы қан тапсырды.

Екі күн бойы өткен акцияға теміржолшылар белсенді түрде атсалысты. Олардың қатарында 15-20 жылдан бері донор болып келе жатқан теміржолшылар да, енді қан тапсырған жас донорлар да бар. Дәрігерлер олардың денсаулығын тексеріп, қан тапсыруға жарамды деген теміржолшыларды қалдырды. Талаптарды білетін теміржолшылар қан тапсырар алдындағы күні кешке майлы, қуырылған және ащы тамақ жемей, сүт өнімдерін және ішімдік ішпей келуі керек. Ал тура қан беретін күні міндетті түрде таңғы ас ішіп, суға қайнатылған ботқа, шай, тәтті печенье жесе болады. Бір сағат бұрын және қан тапсырғаннан кейін бір сағат өтпей темекі шегуге болмайды. Донор болған күні тынығып ұйықтау керек, ауыр заттар көтермеу қажет.  

Тәжірибелі донорлардың бірі, «ҚТЖ» ҰК» АҚ Көпфункционалды қызмет көрсету орталығы Бизнес-архитектура департаментінің бас менеджері Жанбота Шәкіров 20 жылдан бері мұқтаж жандар үшін қан тапсырып келеді.  

– Донор болу – сауапты іс, жылына 3-4 рет қан тапсыруға болады. Өзім адамдарға пайдам тиіп, қиналған жандарға көмек қолын созу үшін тұрақты қан тапсырам. Қазір жасым 45-те, денсаулығым жақсы, темекі тартпаймын, салауатты өмір салтын ұстанамын, қан тапсырудың адам ағзасына тигізер оң әсері көп, – дейді ол.  

Ұйымдастырушылардың айтуынша, «Донор күні» акциясы ҚТЖ-да барлық өңірлерде тұрақты өткізіліп тұрады.