Alstom Қазақстанда жаңа сервистік депо салып жатыр
2026 жылдың мамыр айының соңында Alstom компаниясы Түркістан облысындағы ірі теміржол торабы Арыс қаласында салынып жатқан сервистік депоның таныстырылымын өткізді, деп хабарлайды Rail-news.kz.
Арыс қаласы Қытай мен Еуропа арасындағы Орта дәліздің құрамына кіретін Транскаспий халықаралық көлік бағытының бойында орналасқан. Нысан толық іске қосылғаннан кейін ай сайын 120 электровоз секциясына дейін қызмет көрсетуге мүмкіндік береді.
Депо Қазақстан Үкіметі мен Alstom компаниясы арасындағы 2023 жылғы инвестициялық келісім аясында салынып жатыр. Келісімге сәйкес, 50 млн еуро көлеміндегі инвестициялық бағдарлама шеңберінде компания ел аумағында төрт сервистік локомотив депосын ашуға міндеттелген. Қазіргі таңда оның екеуі (Алматы және Шу қалаларында) жұмыс істеп тұр, үшіншісі 2025 жылдан бері Астана қаласында салынып жатыр. Жобаны жүзеге асыру нәтижесінде елімізде 700 жаңа жұмыс орны ашылады деп күтілуде.
Alstom компаниясы Қазақстан нарығында 2010 жылдан бері жұмыс істеп келеді. Қазіргі уақытта елдегі компания қызметкерлерінің саны 1300 адамнан асады. Француздық өндіруші Қазақстанның төрт қаласында жеті өндірістік алаңға ие, соның ішінде Астанадағы электровоз құрастыру зауыты да бар.