Жолаушылардың тыныштығы – басты назарда
Жыл басынан бері Көліктегі полиция департаментінің қызметкерлері жолаушылар пойыздарынан 283 құқық бұзушыны түсірді. Оның ішінде 251 азамат алкогольдік ішімдік ішкені және қоғамдық орындарға масаң күйде келгені үшін, 17 адам ұсақ бұзақылық жасағаны үшін және т.б деп хабарлайды Rail-news.kz.
Осындай кезекті дерек ағымдағы жылдың 23 маусымында тіркелді. Сексеуіл станциясындағы көліктегі полиция бөлімшесінің қызметкерлері пойыз бастығының актісі негізінде «Алматы – Ақтөбе» бағытындағы жолаушылар пойызынан үш құқық бұзушыны түсірді.
Тексеру барысында 38, 34 және 20 жастағы Атырау және Арыс қалаларының тұрғындары алкогольдік масаң күйде болғаны анықталды. Олар өз әрекеттерімен қоғамдық тәртіпті бұзып, өзге жолаушылардың мазасын алған.
Құқық бұзушылар полиция бөлімшесіне жеткізіліп, қоғамдық орындарда масаң күйде жүргені үшін жауапкершілікке тартылды. Олардың әрқайсысына 5 АЕК мөлшерінде айыппұл салынды.
Көлік полицейлері жолаушыларға пойыздың қоғамдық орын болып табылатынын еске салады. Сондықтан әрбір азамат белгіленген тәртіп қағидаларын сақтап, айналасындағылардың құқықтары мен тыныштығын құрметтеуі тиіс.
Заң талаптарын сақтау мен өзара сыйластық – барлық жолаушылар үшін қауіпсіз әрі жайлы сапардың кепілі.