Үздік аудармашы

Қазақстан Республикасындағы тіл саясатын дамытудың мемлекеттік тұжырымдамасын іске асыру аясында Ақтау теңіз сауда портында «Үздік аудармашы» байқауы өтті.

«АММТП» ҰК» АҚ кәсіподақ ұйымының қолдауымен ұйымдастырылған іс-шараның мақсаты – кәсіпорын қызметкерлерінің қазақ тілін меңгеру деңгейін арттыру, мемлекеттік тілде іс жүргізу дағдыларын жетілдіру және салалық терминдерді сауатты қолдану мәдениетін насихаттау. Байқауға қатысушылар қазақ тілін білу деңгейін, кәсіби терминдер мен өндірістік қызметте жиі қолданылатын тұрақты сөз тіркестерін дұрыс пайдалану шеберлігін көрсетті. Қазылар алқасының құрамына облыстық және қалалық «Үздік аудармашы» байқауларының жүлдегерлері, сондай-ақ кәсіпорынның кәсіподақ ұйымының өкілдері енді.

Байқау қорытындысы бойынша бірінші орынды заң кеңесшісі Абылай Бердиев иеленсе, екінші орын жүк қоймасының тальманы Айгүл Ешмұхановаға бұйырды. Ал үшінші орынды кадрлар жөніндегі маман Пания Төлегенова еншіледі. Жеңімпаздар Құрмет грамоталарымен және естелік сыйлықтармен марапатталды. Ал қалған қатысушыларға көрсеткен білімі, белсенділігі және тілдік дағдыларын жетілдіруге деген ұмтылысы үшін ынталандыру сыйлықтары табысталды.