ҚТЖ басшысы мен Маңғыстау облысының әкімі Ақтау вокзалындағы жөндеу жұмыстарымен танысты
«Қазақстан темір жолы» ҰК» АҚ Басқарма төрағасы Талғат Алдыбергенов Маңғыстау облысының әкімі Нұрдәулет Қилыбаймен бірге Ақтау станциясының теміржол вокзалын жаңғырту жұмыстарының барысымен танысты деп хабарлайды Rail-news.kz.
Вокзалды жаңғырту Мемлекет басшысы мен Үкіметтің көлік инфрақұрылымын дамыту жөніндегі тапсырмалары аясында жүзеге асырылуда және жолаушыларға қызмет көрсету сапасын, қауіпсіздік пен жайлылық деңгейін арттыруға бағытталған.
Жұмыс сапары барысында ҚТЖ басшысы құрылыс-монтаж жұмыстарының қарқыны мен сапасын, сондай-ақ нысанның пайдалануға беруге дайындығын бағалады.
Нысанды аралау қорытындысы бойынша жаңғырту жұмыстарын бекітілген мерзімде аяқтауды қамтамасыз ету, орындалып жатқан жұмыстардың сапасына бақылауды күшейту және барлық іс-шараларды белгіленген мерзімде аяқтау жөнінде тапсырмалар берілді.
Теміржол вокзалы өңір үшін маңызды әлеуметтік мәнге ие. 2026 жылдың бірінші жартыжылдығында Маңғыстау облысының аумағында 280 мыңнан астам жолаушы тасымалданды. Өңірде ҚТЖ-ның 6 пойызы және халықаралық қатынастағы 7 транзиттік пойыз қатынайды.
Биылғы жылдың наурыз–сәуір айларында жылжымалы құрамды жаңарту бағдарламасы аясында ҚТЖ RWS Wagon отандық өндірісінің жаңа 30 жолаушылар вагонынан жасақталған №109/110 пойызының үш құрамын жаңартты.
Айта кетейік, №109/110 «Маңғыстау – Ақтөбе» пойызы Қазақстанның батыс өңіріндегі негізгі бағыттардың бірі болып табылады және Маңғыстау мен Ақтөбе облыстары арасында тұрақты теміржол қатынасын қамтамасыз етеді.
