ҚТЖ Басқарма төрағасы Атырау теміржол вокзалын жаңғырту жұмысын жеделдетуді тапсырды
«Қазақстан темір жолы» ҰК» АҚ Басқарма төрағасы Талғат Алдыбергенов Атырау станциясындағы теміржол вокзалын жаңғырту барысымен танысты, деп хабарлайды Rail-news.kz.
Нысанды реконструкциялау Мемлекет басшысы мен Қазақстан Республикасы Үкіметінің көлік инфрақұрылымын дамыту жөніндегі тапсырмалары аясында жүргізілуде. Жоба жолаушыларға қызмет көрсету сапасын арттыруға, қауіпсіздікті қамтамасыз етуге және келушілер үшін қолайлы жағдай жасауға бағытталған.
Нысанды аралау барысында ҚТЖ басшысы құрылыс жұмыстарының ұйымдастырылуын сынға алды. Атап айтқанда, құрылыс-монтаж жұмыстары кезінде еңбекті қорғау және өндірістік қауіпсіздік талаптары мен шараларының сақталмауы, құрылыс жұмыстарына тартылған жұмысшылар санының жеткіліксіздігі, сондай-ақ мердігер ұйымдардың жұмысына бақылаудың әлсіздігі атап өтілді.
Талғат Алдыбергенов анықталған кемшіліктерді қысқа мерзімде жоюды, тартылған жұмысшылар мен техника санын арттыруды, қауіпсіздік талаптарының мүлтіксіз сақталуын қамтамасыз етуді және құрылыс-монтаж жұмыстарының қарқынын жеделдетуді тапсырды.
Берілген тапсырмалардың орындалуы ерекше бақылауға алынды.
