ҚТЖ қызметкерлеріне арналған барлық сервис енді бір платформада
«ҚТЖ» ҰК» АҚ филиалы – «Магистральдық желі дирекциясында» Aitu қосымшасымен біріктірілген бірыңғай ақпараттық кеңістік құру жұмыстары аяқталды, деп хабарлайды Rail-news.kz.
Жаңа корпоративтік сайт филиал жаңалықтары мен жұмысшыларға ең қажетті сервистердің басын қосып, ақпарат алуды әлдеқайда қолайлы әрі жедел ете түсті.
Сайттың басты бетінде барлық пайдаланушы үшін филиал қызметіне қатысты өзекті жаңалықтар мен материалдар қолжетімді. Ал Aitu қосымшасы арқылы жүйеге кірген соң, қызметкерлерге күнделікті жұмысқа қажетті корпоративтік сервистер ашылады.
Атап айтсақ, «Санаторий-курорттық сауықтыру» бөлімінде жолдама алу шарттары, жадынамалар, өтініш үлгілері, квоталар туралы мәліметтер мен басқа да қажетті құжаттар орналастырылған. «Санаторий-курорттық сауықтыруға арналған материалдық көмек» бөлімінде санаторийлер тізімі, сондай-ақ бұл көмекті рәсімдеуге арналған құжаттар мен ұсыныстар берілген.
Сергек өмір салтын ұстанатындар үшін «Спорт» бөлімі қарастырылған. Мұнда алдағы өтетін жарыстар туралы ақпарат жарияланып, спорттың әртүрі бойынша спортшылар пулына енуге өтінімдер қабылданады.
«Балалардың жазғы демалысы» бөлімінде балалар лагерьлері, жолдама алу шарты және өтініш формалары жинақталған. Демалыс ауысымы аяқталған соң ата-аналар өз пікірін қалдырып, фотосуреттермен бөлісе алады.
«Ерікті медициналық сақтандыру» (ЕМС) бөлімі бағдарламаға қатысатын медициналық ұйымдарды жылдам табуға және сақтандыру қызметі бойынша өзекті ақпаратпен танысуға мүмкіндік береді.
Бұл – жаңа ресурстың мүмкіндіктерінің бір бөлігі ғана. Корпоративтік сайт алдағы уақытта да дамып, жаңа сервистермен және пайдалы функциялармен толығып отырады.
Бірыңғай ақпараттық кеңістік құру – филиалдың ішкі процестерін цифрландыруға, корпоративтік қызметтердің қолжетімділігін арттыруға және қызметкерлермен өзара әрекеттесудің заманауи арналарын дамытуға бағытталған тағы бір маңызды қадам болды. Жаңа ресурс барлық маңызды сервисті бірыңғай цифрлық ортаға біріктіріп, қажетті ақпаратты интернет бар кез келген жерден және кез келген уақытта алуға жағдай жасайды.