ҚТЖ Бас есептеу орталығында жастардың сала ардагерлерімен кездесуі өтті
Темір жол көлігі қызметкерлері күні қарсаңында ҚТЖ – «Бас есептеу орталығы» филиалында жас теміржолшылардың Орталық ардагерлер кеңесінің төрағасы, Құрметті теміржолшы Болатбек Дүйсемалиевпен кездесу өтті, деп хабарлайды Rail-news.kz.
Іс-шараға Құрметті теміржолшылар Қанат Әлмағамбетов, Қайрат Рсымбетов және Гүлнар Таласпаева қатысты. Кездесу мемлекеттік тілді дамыту және насихаттау жөніндегі іс-шаралар шеңберінде жүзеге асты.
Жас мамандар 50 жылдан астам уақытын теміржол саласына арнаған Болатбек Бекеұлының кәсіби жолымен танысты. Ол Қызылорда станциясының кезекшісінен Алматы Ақпараттық-есептеу орталығын, Тасымалдауды басқару орталығын және Тасымалдау процесін үйлестіру департаментін қоса алғанда, ҚТЖ ірі бөлімшелерінің басшысына дейінгі жолды басынан өткерді.
Кездесу қазіргі Бас есептеу орталығының ізашары – Целиноград станциясында түйінді есептеу орталығының құрылғанына 50 жыл толуына орай өткізілді. 1991-1993 жылдары Болатбек Дүйсемалиев Қазақстан тәуелсіздігінің алғашқы жылдарында Алматы Ақпараттық-есептеу орталығының жұмысын қамтамасыз ете отырып басқарды.
Болатбек Бекеұлы өз жұмысы туралы естеліктерімен бөлісіп, жас әріптестерінің сұрақтарына жауап берді және оларға кәсіби өсуді, теміржол саласының дәстүрлеріне жауапкершілік пен адалдықты тіледі.