«Жүк тасымалының» жетістігі
«Қазақстан теміржолшысы» газетінің тілшісі
«ҚТЖ-Жүк тасымалы» ЖШС-де теміржолшылардың төл мерекесіне орай үздік сала мамандары марапатталды. Жиынды серіктестіктің бас директоры Асан Үмбетов құттықтау сөзбен ашып, жүк тасымалының үздіксіз қозғалысын қамтамасыз етіп жүрген теміржолшылар қандай марапатқа да лайық екенін жеткізді.
– Бүгінгі таңда біздің ең үлкен жетістігіміз – жүк айналымының көрсеткіші, осы жылдың алты айында ол 140 млн тонна ткм неттодан асты. Осы нәтижеге қол жеткізуде қарапайым еңбек адамдары, нағыз теміржолшылардың үлесі зор. Ел экономикасының күретамыры саналатын теміржолшы деген беделді мамандық иелерінің бәрін төл мерекемен құттықтаймын, – деген серіктестік басшысы жалпы теміржолда атқарылып жатқан ірі жобаларға тоқталып өтті.
Мереке қарсаңында 16 теміржолшы, соның ішінде Жаңаарқа локомотив пайдалану депосының машинисі Олег Ложкин, Қарағанды локомотив пайдалану депосы бастығының эксплуатация бойынша орынбасары Талғат Абенов, «ҚТЖ-Жүк тасымалы» ЖШС «Отын ресурстық орталығы» филиалы Өскемен отын қоймасының бастығы Қанат Оспанов «Құрметті теміржолшы» төсбелгісіне ие болды.
Одан әрі теміржолшылар «Адал еңбегі үшін» төсбелгісімен, «Кәсібі бойынша үздік» төсбелгісімен, «ҚТЖ» ҰК» АҚ Басқарма төрағасының Құрмет грамотасымен, Компания Басқарма төрағасының Алғыс хатымен, «ТЖЫҰ-ны дамытуға қосқан үлесі үшін» мерейтойлық дипломы және ТМД қатысушы мемлекеттері теміржол көлігі бойынша Кеңесінің Құрмет грамотасымен, сондай-ақ бірқатар азаматтар «Жас үздік маман» атағымен, «ІІІ дәрежелі Теміржол даңқы» төсбелгісімен марапатталды. Серіктестік директоры атынан марапатталғандарға арнайы қол сағаттар тарту етілді.