Алматы-1 – Шу телімі: транзиттік жүк ағымы кеңейтуді қажет етеді

Жаңалықтар

29.07.2016, 10:28

«Нұрлы жол» бағдарламасы аясында «Қазақстан темір жолы» ҰК» АҚ жүзеге асырып жатқан «Алматы-1 – Шу теліміндегі екінші жолдар құрылысы» жобасы Қазақстанның транзиттік-көліктік әлеуетін айтарлықтай көтерері анық. Сол себепті оған аса мән беріліп, барынша жоғары көңіл бөлінуде. Ұлттық компания президенті Асқар Мамин 27 шілде күні осы телімде болып, нысанның құрылыс барысымен танысты және басшылармен жиналыс өткізді. «Елбасымыз Қазақстанның транзиттік әлеуетін дамыту туралы тапсырма бергені мәлім. Алматы-1 – Шу телімі шығыстан батысқа қарай жүктер ағылатын көлік дәлізінің қақ ортасында жатыр. Оның үстіне тек қана Қытайдан ғана емес, барлық Азия елдерінен – Жапония, Оңтүстік Корея, Филиппиннен келетін жүктер ағыны. Транзиттік бағдардың бұл жіңішке жолын кеңейтіп, жылдам артып келе жатқан жүктер ағынын өткізуге мүмкіндік жасау қажет. Сол үшін біз осындай жұмыстар жүргізудеміз», – деп атап өтті Асқар Мамин жобаны жүзеге асыру бойынша жұмыстар кестесін орындаудағы мәселелерді құрылысшылармен талқылау барысында. Қазақстан аумағы арқылы Азиядан Еуропаға, Ресей, Кавказ елдеріне, Парсы шығанағына, Түркияға бағытталған транзиттік жүк ағымы артып келеді. Қазақстан арқылы Қытайдан Еуропаға өтетін транзиттік пойыздар көлемі жыл сайын 2,5 есеге ұлғайып отыр. 2011 жылы Азиядан Еуропаға Транссібір арқылы контейнерлік тасымал транзитінің 90 пайызы, ал Қазақстан арқылы бар болғаны 10 пайызы өткен болса, биыл осы қатынас 65:35 болып өзгерді. Сонымен қатар компания басшысы жолаушылар пойызының қатынас жиілігі артқанына да назар аудартты. Мысалы, Астана – Алматы бағытындағы «Тальго» пойызы желтоқсан айында күніне екі реттен қатынайтын болады деп жоспарлануда. Басқа да жаңа бағдарларды енгізу көзделуде екен. Құрылысшыларға қарата айтылған сөзінде компания президенті қазіргі жұмыс қарқынын жылдамдатып, стратегиялық маңызды жобаны сәтті аяқтау үшін жаз мезгілінің қалған айларын барынша тиімді пайдалану керектігін баса айтты. Алматы-1– Шу теліміндегі екінші жолды алғашқы іске қосу кешенін қосу биыл қараша айында жүзеге асырылмақ. Құрылысшылар да өз кезектерінде жұмыстың көп бөлігі жасалып болғанын, жақын күндері барлық бағыттар күшейтілетініне сендірді. Дәл қазіргі таңда 40 км ұзындықтағы жер төсемдерін төсеу аяқталып, 17,5 км жерге Ақтөбе рельс-арқалық зауытынан шыққан отандық өнім – рельстер төселген. Су өткізгіш құбырлар мен көпірлер салу, СОБ және байланыс қондырғыларын, энергетика нысандарын орнату жұмыстары жасалуда. Асқар Ұзақбайұлы бұл сапарында сонымен қатар жақында «Алматы – Шу» теміржол желісі құрылысы бойынша басқарма бастығы болып тағайындалған Рүстем Молдағұловты таныстырып өтті. Бұрын ол «Жол жөндеуші» ЖШС-нің Жезқазған – Сексеуіл және Арқалық – Шұбаркөл темір жолдарының құрылысы бойынша бөлімшені басқарған болатын. Ұлттық компанияның бас инженері Бауыржан Орынбасаровтың мәлімдеуінше, құрылыс-монтаждау жұмыстарын жүргізу үшін 26 тамыз бен 6 қыркүйек аралығында технологиялық «толаскездер» белгіленетін болады. Соған байланысты жолаушылар пойыздарының жүру кестесіне өзгерістер енгізіліп, билеттер де сол түзетулер есебімен сатылуда екен. Жобаға сәйкес, ұзындығы 110 км басты екінші жолдарда жол үсті құрылыс материалдары төселеді. Желі бойынша 90 жасанды имарат, соның ішінде 10 көпір салынып, 12-сі ұзартылмақ. 63 су өткізгіш құбыр мен 35 бағыттама бұрмалары салынбақ. Бірінші іске қосу кешені бойынша 58,2 км телімде ағымдағы жылдың қараша айында қозғалыс ашылады деп жоспарланып отыр.

Алматы-1 – Шу телімі: транзиттік жүк ағымы кеңейтуді қажет етеді

Басқа да жаңалықтар

Қазақстан теміржолшысы газеті, №49 27 маусым 2025 жыл