Көресіні төрттұяқтыдан көрдік...

Жаңалықтар

13.04.2018, 12:07

Маңғыстау жол дистанциясы қызметкерлерінің міндеті – әрине, пойыздардың қозғалыс қауіпсіздігін қамтамасыз ету мақсатында жол жағдайын күтіп ұстау. Алайда, олардың жұмысына кедергі келтіретін, жалпы пойыздар қозғалысына қауіп төндіретін бір нәрсе бар. Ол – сол баяғы ауа жайылған төрт түлік мал. Дистанция мамандарының айтуынша, теміржолшылар ішкі істер желілік бөлімі, Маңғыстау облысы бойынша көліктік және су бақылау инспекция қызметкерлерімен бірлесе мал иелерімен үнемі жүргізетін профилактикалық жұмыстар жүргізетініне қарамастан тұяқтылардың тепловоздың алдына шығуы азаяр емес. Соның салдарынан бірінші тоқсанда Маңғыстау локомотив депосының машинистері 18 оқыс тежеу берген. Біреуінде мал басылған. Мамандардың дерегінше, бір шұғыл тоқтаудың өзі 0,050 кг жанармай шығындайды екен. Сондықтан дистанцияда 02-31 сәуір аралығында жарияланған «Абайла! Жолда мал!» айлығы осы келеңсіздікпен күресті тағы да күшейткен. Айлықтың алғашқы күндері теміржолға жақын ауыл әкімдіктеріне, ауыл жұртшылығының малын бақылауда ұстауы жөнінде, атап айтқанда Қызылтөбе, Баянды, Дәулет, Маңғыстау ауылдарының әкімдеріне хат жазылыпты. Мұндай үлгідегі хат теміржол маңындағы өзге ауыл биліктеріне де ұдайы жіберілетін көрінеді. Малға қарсы салынған қоршаулардың бұзылып, сынған бөліктеріне жөндеу жұмыстары басталмақ. – Көресіні осы төрттұяқтылардан көрдік. Жолды малдан қоримыз деп жолшыларымыз бақташыға айналатын болды, – деп күйінеді дистанцияның жетекші жол инженері Ержан Артықбаев, – дистанцияға қарасты жолдардың 388 шақырымында малға қарсы қоршаулар бар. Биыл соның 40 шақырымында бүлінген жерлері қайта жасалып, жаңартылмақ. Ірі қара негізінен №14-15, №14-Шетпе-13, №11-10 бекеттері,Өзен-Жетібай, Өзен-Бастау аралықтарында теміржолға жиі шығады. Жолдағы қоршау сымдар үзіліп, бағаналары құлап жататын жағдайлар да жиі кездеседі. Мұны малын өткізу үшін адамдардың өздері де істеуі мүмкін. Одан өзге малдар да кіріп, теміржол көлігіне кедергі келтіреді. Жыл басынан бері сондай жерлердегі мал иелерімен арнайы кездесіп, тиісті жұмыстар жүргізудеміз. Қараусыз мал үшін ҚР Әкімшілік құқық бұзу туралы Кодекстің 30-тарау 559-бабына сәйкес 10 айлық есептік көрсеткіш мөлшерінде айыппұл қарастырылғанын тағы ескертеміз.

Көресіні төрттұяқтыдан көрдік...

Басқа да жаңалықтар