Жаңа вокзалды аралады
«Қазақстан теміржолшысы» газетінің тілшісі
Өткен аптада елордада «Темір жолды цифрландыру» тақырыбында өткен көрмеге келген мәртебелі қонақтар, сондай-ақ «Нұрлы жол» вокзалын аралады.
Атап айтқанда, «РТЖ» ААҚ президентінің аға кеңесшісі Валентин Гапанович, «Беларусь темір жолдары» компаниясының бас инженері Валерий Шубадеров, «Трансмашхолдинг» ЖАҚ техникалық директоры Владимир Шнейдмюллер сияқты мәртебелі меймандарды ұлттық компанияның бас инженері Батыр Котырев бастап барды. Стратегиялық маңызға ие заманауи нысанды темір жол вокзалы кешенінің бастығы Дінмұхаммед Құсайынов аралатып, толық ақпарат бере жүріп, таныстырды. Төртінші қабаттағы күту залынан басталған экскурсия барысында қадірменді меймандарға жаңа ғимараттың үлкен көлемдегі макеті көрсетілді.
– Біздегі орталық табло әуежайлардағы таблолармен бірдей жұмыс істейді. Өте ыңғайлы. Барлық ақпарат үш тілде беріледі. Пандустар екі жағынан да симметриялық түрде орналасқан. Екінші қабатта 750 көлік сыятын паркинг бар. 5-қабат – футкорг, 6-қабатта қонақ үй мен әкімшілік орналасқан, – деді кешен бастығы.
Ол вокзалдың электр энергиясын үнемдеу жүйесімен де, шатырдағы табиғи суды жинап, техникалық мақсатта қайталап пайдалану мүмкіндігі туралы айтып берді. Оларға пойыз жүретін эстакада көрсетіліп, билет кассалары, қауіпсіздік бойынша арнайы қызметтер және тағы да басқа жолаушылар мен келушілер сұранысына сай орындар таныстырылды. Экскурсия соңында қонақтарға бас инженер ұлттық компания атынан «Нұрлы жол» вокзалының сувенир макетін сыйға тартты.