«Нұрлы жол» вокзалында он миллионыншы жолаушыны құттықтады
«Қазақстан теміржолшысы» газетінің тілшісі
1 маусым – «Нұрлы жол» теміржол вокзалы кешенінің құрылғанына 2 жыл толуына орай өткен шарада вокзалдың он миллионыншы жолаушысы анықталды. Балдырғандар мейрамымен қатар келген мерекелік жиын үстінен түскен жолаушы, елорда тұрғыны Ерлан Қадырбаев отбасымен Сарыағашқа демалуға баруға билет алған екен.
Вокзалда мұндай тосынсый күтіп тұрғанын күтпеген қуаныш иелеріне кешен атынан атаулы мерекелік торт тарту етілді.
– Біз бұл тарихи сәттің куәгері әрі себепшісі болғанымызға ерекше қуанып тұрмыз. Демалыс алдындағы сапарымыз өте сәтті басталуда. Вокзал қызметкерлеріне үлкен алғысымызды білдіреміз. Еліміздің көрікті ғимараты, бас қаламыздың бас қақпасы жайнап, гүлдене берсін! – деді Ерлан.
Балалар күнімен тұспа-тұс келген екі жылдық мейрамға вокзал қызметкерлерінің 50 баласы және НұрСұлтан-1 станциясындағы құрылымдық бөлімшелер теміржолшыларының 50 баласы қатысты. Соған қоса вокзалда пойыз күтіп отырған жолаушылар балалары, тағы да басқа келушілер думанды жиынның қызықтарынан құр қалмады. Мерекелік шараны вокзал директоры Дінмұхаммед Құсайынов құттықтау сөзбен ашып, стратегиялық маңызға ие нысанның тыныс-тірлігінен хабардар етті.
– Вокзал кешені ашылғалы бері бұл теңдессіз заманауи ғимараттан 22 мыңнан астам пойыз жөнелтіліпті. Кешеннің ашылуымен екі жарым мыңнан астам адам жұмыспен қамтылды. Жоғары кәсібиліктеріңді сақтай отырып, вокзал жұмысын жандандырып келе жатқандарыңызға рахмет, әріптестер, одан әрі де халыққа адал қызмет ете берейік, – деді Д. Құсайынов.
Құттықтау тілектерін «Қазпрофтранс» ҚБ «НұрСұлтан» торабы филиалының төрағасы Серік Сәрсекеев пен Магистральдық желі дирекциясының Адами ресурстарды басқару департаментінің бас менеджері Алма Сәулебаева да жеткізіп, кешен қызметіне сәттілік тіледі. Екі жыл бойына кешен ұжымы жолаушылар мен келушілер үшін қол жүктерін тасу секілді сервистің жаңа қызметтерін енгізе отырып үздіксіз жұмыс істеп келеді. 11 орындық қонақүй кешені, 10 орындық футуристік капсулды мейманхана ашылды. Вокзал кешені жолаушыларын барлық жағынан ақпараттандыру мақсатында әлеуметтік желі-лерде парақшалар тоқтаусыз жүргізіліп, жаңартылуда.
Кешен қызметкерлерінің білімін көтеру бағытында оқу тренингтері, спорттық және қоғамдық шаралар өткізіліп тұрады. Вокзал тарихында осында қызметке тұрып, кейін көңілдері жарасқан жастардың арасынан 10 отбасының пайда болуы сияқты жағымды оқиғалардың болғаны да жан жадыратар жаңалық.
Мерекелік бағдарламада тамылжыта ән айтылып, мың бұралған би флешмобқа ұласты, сондай-ақ, түрлі викториналық ойындар қамтылды. Той-думан барысында балаларға вокзал кешені атынан балмұздақтар тегін таратылды. Балалар мейрамы мен теміржолға және «Нұрлы жол» вокзал кешеніне қатысты сұрақтарға дұрыс жауап берген азаматтар арнайы сыйлықтармен марапатталып, естелікке суретке түсірілді. Сонымен қатар балаларға аквагрим салу, аниматорлармен шоу бағдарламалар көрсету, бормен сурет салу, түрлі-түсті шарларға ие болу сынды шаралар сыйлық ретінде ұйымдастырылды. Жиын соңында биыл 30-31 мамыр аралығында өткен спорттық іс-шаралардың қорытындысы шығарылып, жеңімпаздары марапатталды.