Пойызға кешігіп секіріп мінген ер адамды жауапқа тартты
Атырау облысы бойынша меншікті тілші
Елімізде темір жолдың рұқсат етілмеген жерлерінен өткені үшін айына жүздеген адам әкімшілік жауапкершілікке тартылады екен. Сондай-ақ, жуырда Атырауда мынадай да оқиға тіркелді.
Көлік полициясы қозғалып бара жатқан «Атырау-Алматы» пойызы вагонының басқышына секіріп мінген азаматты жауапқа тартты. Көліктегі полиция департаментінің әкімшілік полиция басқармасының бастығы Жасұлан Бәйкеновтің айтуынша, «Атырау-Алматы» пойызының жолсерігі пойыздың тоқтату кранын басқаны анықталған. Жолсерік жүріп бара жатқан пойыз вагонының басқышына секіріп мініп, тұтқаға жармасқан ер адамды көрген соң бұл әрекетке барған екен. Ол жолаушының өміріне қауіп төнді деп ойлап тоқтату кранын басуға мәжбүр болған. Сәйкесінше пойыз 5 минут тоқтап тұрған. Кейін белгілі болғанындай, 41 жастағы ер адам пойызға кешігіп қалған. Сондықтан жүріп бара жатқан пойызға жармасқан. Ал егер қолы тұтқаға ілінбей немесе аяғы тайып кетсе ше? Осындай көзсіз тәуекелге барам деп вагон дөңгелегінің астына түсіп ажал құшып жатқандар аз емес...
Сондықтан, ол азаматқа қатысты Әкімшілік құқық бұзушылық Кодексінің 560-бап, 1-бөлімі («Жүк поездарында заңсыз жүрiп-тұру, поезд жүрiп бара жатқанда отырғызу және түсiру, вагондардың тепкiшектерi мен төбесiнде жүрiп-тұру, қажетсiз ретте поезды заңсыз тоқтату») бойынша әкімшілік хаттама толтырылды және ол 5 АЕК көлемінде (12 625 теңге) айыппұл төлейтін болды. Жалпы, тоқтату кранын жолаушы кешіккен жағдайда қолдануға болмайды. Оны апаттың алдын алуда, пойыз құрамы жолдан шыққан немесе жолаушылар өміріне қауіп төнген жағдайда қолданатынын еске саламыз.