Өткелдегі өзекті мәселе

Күзетілмейтін өткелдер мәселесі қашан да өзекті. Күзеті бар өткелдерде қауіпсіздік қағидаларын сақтау дегенді онша ойға ала бермейтін жүргізушілер үшін күзетілмейтін өткелді кедергі көрмесі анық.   Шымкент жол дистанциясының инженері Дана Өмірбаеваның айтуынша  жуырда болған оқиға осының айқын дәлелі. Сәуірдің 9 күні Сайрам – Қазығұрт теліміндегі 9 шақырымның 4 пикетіндегі күзетілмейтін өткелде Шымкент цемент зауытына қарасты «Қазығұрт – Жолы» ЖШС жекеменшігіндегі № 3621 пойызының  ТЭМ-2 № 2207 тепловозы  «ShanchiSх 325 l dm» мемлекеттік нөмірі 740PLA 13 автокөлігімен соқтығысып қалған. Таңғы сағат 8.00 шамасында отыз жасар Р.Байжарқынов есімді автокөлік жүргізушісі Қазығұрт жақтан келе  жатқан тепловозды байқамай өте шықпақ болады. Абырой болғанда отарба сағатына 10-15 шақырыммен жүріп келгендіктен, тек көлік пен тепловоздың алдыңғы бөлігіне зиян келіп, темір жолға да, машинист пен жүргізушіге де зардабы тимепті. – Оқиға негізгі жолда емес, тұйық жолда орын алды. Бұл аралықта үнемі Қазығұрт тауынан қиыршық тас артатын зауытқа тиесілі құрам өнімді Шымкент цемент зауытына тасиды.  Талап бойынша аталған телімде сағатына 25 шақырыммен жүру енгізілген. Жәй жүріп келіп соқтығысқан соң адам шығыны болған жоқ, егер тепловоз сағатына 60-70 шақырыммен жүрсе көлікті қойып, адамның өмірін сақтау қиын болар еді. Осы жағдайдан кейін  дистанциядағы айналым жолдарының техник мамандары мен жол бригадирлері өткел кезекшілерімен бірлесіп сол маңнан өтетін мекемелердің көлік жүргізушілеріне өткелден өтудің ережелерін түсіндірді. Егер күзетілетін өткел болса тәулік бойы тұратын кезекші асығыс көлік иесін тоқтатып, қауіптің алдын алар еді. Күзетілмейтін өткелде жағдай күрделі күйінде қалып отыр, – дейді Шымкент жол дистанциясының инженері Дана Өмірбаева.

Динар МЕЙІРМАН,  Шымкент