Үздік басшы асқаралы алпыста
Кеше Қандыағаш станциясының ұжымы станция бастығы Нұрибай Сәрсеновты 60 жасқа толған мерейтойымен құттықтап, жүрекжарды тілектерін білдірді. Нұрекеңнің аталған станцияны басқарып отырғанына біраз жыл, ал темір жолда тер төккеніне қырық жылға таяпты. Білікті басшының ұйытқы болуымен ісі өрге домалаған Қандыағаш станциясы үш жыл қатарынан, 2009-2012 жылдары «Салалық жарыстың жеңімпазы» деп танылса, Нұрибай Сәрсенов «Үздік басшы» номинациясын иеленді. Кейіпкеріміз замандастары сияқты еңбек жолын қарапайым қызметтен, Шалқар вагон депосында слесарьлықтан бастаған екен. Вагон қараушы, стрелка бұрушы болып та еңбек еткен. Алты жыл станция кезекшісі де болған. Жұмыс істеп жүріп, Алматы темір жол көлігі инженерлері иститутында бітіріп алған. Қызығы мен қиындығы қатар жүретін салада, ол талмай еңбек етіп, тек алға ұмтылды. Еңбекке адалдығы басшылық назарынан тыс қалмай, 1986 жылы ол Ақтөбе жол бөлімшесінің Қандыағаш – Никельтау – Ембі учаскесінің ревизоры болып тағайындалды. Он жыл өткенде Қандыағаш станция кезекшісі, дөңес бастығы қызметтеріне ауысты. Ақтөбе жол бөлімшесінде де жетекшілік қызметтерде болған ол, кейін Қандыағаш станциясына бас инженер болады. Ал станцияға басшылық еткеніне міне, он төрт жылдан асып барады. Әріптестері Нұрекеңнің өз ісінің кәсіби маманы болғанымен қатар орынды талап қоятын әділ басшы, жастардың тәлімгер ұстазы екенін айтады. Темір жол саласындағы көп жыл еңбегінің өтеуіне «Адал еңбегі үшін» төсбелгісімен, Елбасының қаулысымен «Қазақстан Республикасының Тәуелсіздігіне – 20 жыл» медалімен марапатталды. Нұрекең қоғамдық өмірдің қайнаған ортасынан да табылуда. Наурыз мерекесінде киіз үй тігіп, аз қамтылған отбасыларына, зейнеткерлерге дастархан жайып, көп балалы отбасыларына оқу құралдарын алып беру акцияларына да қатысады. Ал кәсіби сауаттылығының арқасында пойыздардың қозғалыс қауіпсіздігін сақтап, жақсы көрсеткіштерге қол жеткізгені үшін Астанадағы «Қазақстан темір жолы» ҰК» АҚ ғимаратының құрмет тақтасында «Yздiк мамандар» қатарында ілулі тұр.
Асқар АҚТІЛЕУ, Ақтөбе