Үш бағытты қамтиды

Жуырда өткен теміржол тораптары кәсіподақ ұйымдарының атқарушы комитеті отырысында Мемлекет басшысы Қасым-Жомарт Тоқаевтың биылғы «Конструктивті қоғамдық диалог – Қазақстанның тұрақтылығы мен өркендеуінің негізі» атты Жолдауы талқыланды.

Сонымен қатар, онда Қазақстан теміржолындағы «Қазпрофтранс» ҚБ «Астана» торабының төрағасы Серік Сәрсекеев филиалдың биыл жыл басынан бергі атқарған жұмыстары туралы баяндады. Күн тәртібінде қаралған бірінші мәселе аталған жолдауды талқылау болса, екінші тақырып «Vision Zero» нөлдік жарақат алушылық тұжырымдамасы, үшіншісі, ұлттық компанияның теміржолшылар балалары үшін жазғы сауықтыру демалысын ұйымдастыру жұмыстары бойынша қорытындысы туралы болды. Кәсіподақ төрағасы «Vision Zero» нөлдік жарақат алушылық тұжырымдамасына қосылу туралы меморандумға Қазақстанның биыл маусым айында қол қойғанын жеткізді. Кәсіподақтар үшін аталған меморандумға қол қою өте маңызды оқиға болып табылады. Бұл еңбек қауіпсіздігін ұйымдастыруға бағытталған жаңа тәсіл, ол үш бағыттан тұрады – қауіпсіздік, еңбек гигиенасы және өндірістің барлық деңгейіндегі жұмысшылардың әлауқаты. «ҚТЖ» ҰК» АҚ мен оның еңбек ұжымы арасындағы 2018-2020 жылдарға арналған ұлттық компанияның Ұжымдық шартына сәйкес Кәсіподақ балалардың жазғы демалысын ұйымдастырады.

– Биыл 15-20 шілде аралығында «Астана» темір жол торабы кәсіпорындары жұмысшыларының 100 баласы, соның ішінде «Жолаушылар тасымалы» АҚ, Астана жол дистанциясы, белгі беру және байланыс дистанциясы, электрмен жабдықтау дистанциясы және басқа мекемелердің балалары өз каникулдарын Нұр-Сұлтан қаласынан 120 шақырымдағы «Nomads Camp» ұлттық лагерінде өткізді. Оған негізінен көпбалалы және аз қамтылған отбасылардан шыққан балалар іріктелді, – деді С.Сәрсекеев. Ал жалпы, биылғы жылы барлығы 7500 бала «ҚТЖ» ҰК» АҚ-ның әлеуметтік саясат бағдарламасына сәйкес жазғы демалыстарында үш ауысымда сауықтыру орталықтарында болған.