«Волонтерлер жылы» бағдарламаға үн қосты
«Қазақстан теміржолшысы» газетінің тілшісі
Өткен аптада Достық станциясында ұлттық компанияның және оның еншілес ұйымдарының жастары дөңгелек үстелде бас қосты.
Мемлекет басшысы Қасым-Жомарт Кемелұлы Тоқаевтың 2020 жылды «Волонтерлер жылы» деп жариялағаны белгілі. Осыған орай «ҚТЖ» ҰҚ» АҚ басқарма төрағасы жанындағы станция бойынша аймақтық өкілі Данияр Бимашев Волонтерлер жылына орай ұлттық компанияның «2020 қайырымды іс» бағдарламасын іске қосқанын айтты.
Сонымен қатар ҚТЖ-ның әлеуметтік желілері ашылып жатқанын мәлімдеді, атап айтқанда, ютуб каналы, инстаграм парақшаларын үлкен экраннан көрсетіп, осы желілерге қосылып, соңғы жаңалықтардан әркез хабардар болуға шақырды. Дөңгелек үстел басында жастарға ютуб каналы арқылы аталған бағдарлама аясында Challenge жолдаған аймақтардың бейнебаяндары көрсетілді.
– Қазіргі қоғамда волонтер дегенді көпшілік іс-шарада жүретіндер деп қабылдайды. Ал біз бұл көзқарастан түбегейлі арылып, волонтерлерді әр бағыт бойынша қызмет көрсетуге қабілетті команда етіп жасақтауымыз керек. Волонтерлік – жастардың өз белсенділігін көрсетіп қана қоймай, адамдарға көмек беріп, тәжірибе жинауға, өмірлік маңызды дағдыларды дамытып, әлемді жаңа қырынан көруге мүмкіндік беретін бірден-бір сала. Сондықтан, уақытты волонтерлікке жұмсау – тұлғалық дамуға құйылған инвестициялар болып табылады, – деген «ҚТЖ» ҰҚ» АҚ-ның 100 жас есім иегері Батыржан Ахметжанов замандастарын «2020 қайырымды іс» бағдарламасына үн қосуға шақырды.