Оң серпін байқалды
«Қазақстан теміржолшысы» газетінің тілшісі
Биылғы бірінші жартыжылдықта елімізде темір жол көлігімен жүк тасымалдауда оң серпін байқалады. Өткен жылы осы кезеңде бұл көрсеткіш 134 млн тоннаны құраса, биылғы алты айда 137 млн тоннаға жетіп, 2,2% өсім болды.
Бұған Экономикалық өсімді қалпына келтіру жөніндегі кешенді жоспар шеңберінде уақытылы қабылданған шаралар ықпал етті деп хабарлайды ҚР Индустрия және инфрақұрылымдық даму министрлігі.
Атап айтқанда, жүк жөнелтушілер үшін жүктерді сақтау, вагондардың тұрғаны үшін алымдар мен төлемдер, сондай-ақ айлық өтінімдер бойынша тиеу жоспарын орындамағаны үшін салынатын айыппұлдар алынып тасталды.
Бұдан басқа, төтенше жағдайда және амалсыз бос тұрған кезеңде, соның ішінде нақты шығындар мен еңбекақы қорын субсидиялау бөлігінде жолаушыларды тасымалдаушыларды қолдау бойынша шаралар қабылданды.
Сонымен қатар, жолаушылар вагондарының тапшылығын жою мақсатында ағымдағы жылдың бірінші жартыжылдығында 50 жолаушы вагоны сатып алынды. Атап айтсақ, Нұр-Сұлтан – Арқалық бағытына 14 вагоннан, Атырау – Маңғыстау – 18, Алматы – Жезқазған – 10, Нұр-Сұлтан – Семей бағытына 8 вагоннан келді.
Бұдан басқа, темір жол көлігімен тасымалдаудың нормативтік негіздерін жетілдіру бойынша белсенді жұмыс жүргізілуде.
Осылайша, биылғы бірінші жартыжылдықта тасымалдаушылар көп болған жағдайда тасымалдау процесіндегі әрбір қатысушының өзара іс-қимыл тәртібін айқындауға бағытталған темір жол көлігі мәселелері жөніндегі заң жобасының тұжырымдамасы әзірленді. Ал үстіміздегі жылдың екінші жартысында жүк тасымалы нарығында шынайы бәсекелестікті дамыту үшін тиісті заң жобасын әзірлеу жоспарланып отыр.