Жолаушылар пойыздар кестесінде өзгеріс енгізілді

«Жолаушылар тасымалы» АҚ тамыз айында бірқатар жолаушылар пойыздарының жүруін уақытша тоқтатып, ал кейбіреулерінің жүру жиілігін қысқартып отыр.

Мұны теміржол көлігі арқылы жолаушылар тасымалын ұйымдастырушы ұлттық оператор елімізде қолайсыз эпидемиологиялық жағдайдың жалғасуы мен енгізілген карантиндік шаралармен және де жолаушылар пойыздарындағы жолаушылар ағыны мен толу деңгейінің төмендеуімен байланыстырып отыр.

Акционерлік қоғам жолаушылар пойыздары қозғалысының қолданыстағы кестесіне өзгерістер енгізу туралы шешімді ҚР Индустрия және инфрақұрылымдық даму министрлігінің келісімі бойынша қабылдағандарын жеткізді.

Сонымен, тамыз айында №4/3, №25/26, №258/257 пойыздарының жүруі уақытша тоқтатылса, №1/2, №10/9, №11/12, №603/604, №67/68, №31/32 жолаушылар пойыздарының жүру жиілігі уақытша қысқартылмақ.

«Жолаушылар тасымалы» АҚ мамандары аталған пойыздарға бұрын жол жүру құжаттарын (билеттерін) ресімдеген жолаушылар жол жүру құжаттарын қайтарып, билет құнын толық көлемде ала алатындарын немесе басқа балама пойыздарға билеттер сатып алуларына болатынын айтып отыр.

Билеттер үшін төлемдерді қайтару билетті сатып алу тәсіліне байланысты қолма-қол және қолмақол ақшасыз есеп айырысу арқылы жүргізіледі.

Теміржол қатынасы Атырау және Маңғыстау облыстарын қоспағанда, республиканың барлық өңірлерінде сақталған. Жолаушылар пойыздарының қозғалыс кестесі бойынша барлық анықтамалық ақпаратты «105» нөмірі бойынша білуге болады.