Теміржолшылар да саяси додадан тыс қалмайды
«Қазақстан теміржолшысы» газетінің тілшісі
Міне, көптен ел құлағын елеңдеткен саяси оқиға бастау алды. Кеше, 17 тамызда «Нұр Отан» партиясының праймеризіне тіркеу басталды. Үміткерлер 28 тамызға дейін өтініш бере алатын бұл бәсекеге партияның елдегі ең ірі ұйымы – «ҚТЖ» ҰК» АҚ теміржолдың бастауыш партия ұйымдары да өз кандидаттарын ұсынып, саяси додаға қатысып бақ сынайды деп күтілуде.
Праймеризге Парламент Мәжілісіне үміткер ретінде жасы 25-ке, ал Мәслихат депутаттығына 20 жасқа толған өз болашағына бей-жай қарамайтын, өмірлік ұстанымы айқын азаматтар қатыса алады. Ал теміржол саласында басқару менеджментін жетік меңгерген, өзін-өзі жан-жақты дамытумен айналысып жүрген, командамен жұмыс істеуге дағдыланған, өзіндік көзқарасын ашық және айқын айта алатын, яғни демократиялық ұстанымы бар жастар өте көп.
Олардың дені ҚТЖ-ның жылдар бойы жүргізіп келе жатқан жастар саясатының жемісі десек, қателеспейміз. Олар – жан-жақты, білімді, батыл идеялары мен креативті жобаларымен танылып жүргені елдегі саясаттан да, «Нұр Отан» партиясының бастамаларынан да хабары бар бастамашыл жастар.
Тіпті, теміржол саласында еңбек етіп жатқан 10 мыңнан астам жастардың еліміздегі басты партия мүшелігіне өтуі, партияда және теміржолда болып жататын игі бастамалардың бел ортасында жүріп, белсенділік танытуы олардың көзі ашық, көкірегі ояу, ел болашағына бейжай қарамайтынын анық аңғартса керек. Демек, праймеризге теміржолшы жастардың да таласы бар. Және ол – құптарлық іс.
Праймеризге үміткер ретінде тіркелгенге дейін партияда болмаса да кез келген Қазақстан азаматының мүмкіндігі бар, тек тіркелгеннен кейін партияға мүше болуға болады.
Жастар праймериз жаңа лидерлерді анықтауда таптырмайтын тетік екенін жарыса жазуда. Сондай-ақ, белсенді азаматтарға бұл елге әзірше атауы таңсық науқан өзі тұратын аумақтың проблемаларын көтеріп, көкейкесті мәселелерді шешуге мүмкіндік берер болса, екіншіден, саяси коммуникацияға, мемлекеттік басқаруға араласуға төте жол іспеттес. Қызылорда жүк тасымалы бөлімшесінде өндіріс бөлімінің жетекшісі болып жұмыс істейтін Нұрлан Бимұратов – праймеризге тіркелуге үмітті теміржолшы жастардың бірі. Ол өз бағдарламасын аталған өңірдің әлеуметтік жағдайын көтеру мәселесіне арнап отыр.
Мәселен, жаңа өндіріс орындарын ашу арқылы жаңа жұмыс орындарын құру, жұмыссыздықты жою, жастардың аймақта қалып, білікті маман болып қалыптасуын қамтамасыз ету сынды тағысын тағы мәселелер Нұрланның көкейінде жүрген мәселелер екен. Праймеризге маңғыстаулық теміржолшы жастар да белсенді қатысуды көздеп отыр.
Еске салып өтерлігі, праймериз қорытындысы 3 қазанда шығады. Праймеризге қатысушы жастарға ел игілігіне және болашағына бағытталған тың ой, батыл қадамдарыңыз болсын, әділдік жолында ар-намысқа жүгініңіздер демекпіз.
Ал теміржолшылар үкілеп бәйгеге қосқан жүйріктерге қолдау көрсетеріне сенеміз.