Вагон-мейрамханалар жұмысы жанданады
«Қазақстан теміржолшысы» газетінің тілшісі
Карантиндік шектеу шараларының кезеңкезеңімен жұмсартылуы пойыздағы вагон-мейрамханалар қызметіне де келіп жетті. Осы аптадан бастап Қазақстандағы жолаушылар пойыздарында олардың қызметі қайта жанданбақ.
Көліктегі бас мемлекеттік санитариялық дәрігер Сәдуақас Байғабұловтың қаулысына сәйкес мұндай вагондардағы орындардың тек 50 пайызы ғана адаммен толтырылып, олар әлеуметтік арақашықтықты сақтап отыру керек. Сонымен қатар вагон-мейрамханада жолаушылардың алдын ала тапсырыс беруімен тамақтарды купелеріне жеткізіп беру қызметі қарастырылады. Бұл қауіпсіз әрі тиімді сервистік қызмет көрсету болмақ.
– Бұл ретте тамақтану орнының персоналы міндетті түрде маска және арнайы бір реттік қолғап киіп жүруі керек. Күн сайын ауысым алдында термометрмен қызуы тексеріліп, жұмысқа шығар алдында бойында вирус бар-жоқтығын тексертіп отыруы қажет болады. Мейрамханада санитарлық-зарарсыздандыру режимі қатаң сақталып, дайын тағамдар тапсырыс берген жолаушыларға арнайы беті жабық ыдыстарға салып апаруы талап етіледі, – дейді бас дәрігер.
Сонымен қатар егер бетперде тағып және араларына 1 метрден кем емес қашықтық салуды сақтаған жағдайда жолаушылар вагондар арасында еркін жүре берсе болады. Ал коронавирус бойынша басқа шектеу шаралары өз күшінде қалады.