Тек ішкі қатынаста жүреді
Атырау облысы бойынша меншікті тілші
25-26 қыркүйектен бастап Атыраудан 4 бағытта жолаушы пойыздар қатынасы қайта жанданды. Олар: №41/42 «Атырау-Алматы-1», №47/48 «Атырау - Нұр-Сұлтан-Нұрлы жол», №313/314 «Атырау - Маңғыстау» және №691-692 «Ақтөбе-Атырау» жолаушы пойыздары.
Оның ішінде алғашқы үш бағыт бойынша вагондар мен жолсеріктер құрамы Атыраудан жасақталады.
«Жолаушылар тасымалы» АҚ «Батыс» филиалы, Атырау телімінің бастығы Әлмұқан Есқалиевтің айтуынша, вагондар құрамы жолаушылардың сұранысына қарай жасақталуда. «Бұрын Алматы, елорда бағыттары бойынша бір пойызда 22 вагоннан құралған болатын. Қазір сұранысқа қарай вагондар санын бөліп отырмыз. Мысалы, бүгінгі күнге Алматы бағытына сатылған билеттер 22 пайызды, Нұр-Сұлтанға 19 пайызды, ал Маңғыстауға 40 пайызды құрап отыр. Сондықтан да жолаушылар санына қарап вагондар санын шығарып отырмыз. Алматы мен елордаға 6 вагоннан бөлдік. Егер 25-не дейін сатылған билеттер айтарлықтай көбейсе, онда купе және плацкарт вагондарын қосамыз. Бірақ әзірге оған сұраныс жоқ» дейді ол.
Сондай-ақ, елдегі карантин шараларының сақталуына орай жолсеріктерге бетперде, қолғап, басқа да санитарлық құралдар беріліп отыр. Барлық бағыт бойынша жолсеріктер қайта нұсқаулықтан өтіп, жұмысқа кірісуге дайын. Ал «Атырау-Астрахань» бағыты бойынша жүретін пойыз әзірге тоқтап тұр. Халықаралық пойыз қатынасына жол ашылмағандықтан, оның қашан жүретіні белгісіз.