Атырау станциясының бастығын «Еңбек даңқы» орденімен марапаттады
Атырау облысы бойынша меншікті тілші
Темір жолға бүкіл өмірін арнап, темір жолдың майталман маманына айналған, оның өркендеуіне елеулі үлес қосып жүрген азаматтардың еңбек жолы – өскелең ұрпаққа өнеге. Солардың қатарында асқаралы 60 жасқа толған Атырау станциясының бастығы Алтай Көбегеновті атауға болады. Мерейгерді Атырау жүк тасымалы бөлімшесінің басшысы Дархан Құланбаев құттықтап, ұжымдастары алдында оған Алғыс хат табыс етті. «Құрметті теміржолшы» белгісінің иегері Алтай аға – пойыз құрастырушыдан бастап бөлімше басшылығы аралығындағы үлкен жолды еңсерген маман. Сол еңбектің арқасында құрметке бөленіп, ҚТЖ Құрмет тақтасына да ілінді. Ол еңбек жолын Ақтөбе темір жол бөлімшесінде №142-ші бекет кезекшісінен бастады. Алматы теміржол көлігі инженерлері институтын «Темір жол көлігін ұйымдастыру және басқару» мамандығы бойынша бітіріп, жолдамамен Атырауға келді. Теміржолшылар әулетінен шыққан ағамыз қалтасында табақтай дипломы бола тұра, берген жұмысты талғамай, Құлсарыда пойыз құрастырушының көмекшісі болды. Содан маневр, пойыз диспетчері, бас инженер, Мақатта станция бастығы лауазымдарын, Атырау жол бөлімшесі бастығының бірінші орынбасары қызметін абыроймен атқарды. 2005 жылы «Адал еңбегі үшін» төсбелгісімен марапатталды. Мақат аудандық мәслихатының депутаты болып, теміржолшылардың әлеуметтік жағдайының жақсаруына да елеулі үлес қосты. Алтай Азанқұлұлы – қоғамдық жұмыстардың да белсенді мүшесі. Ол мектептерге де қолдан келгенше көмегін аямай, аз қамтылған отбасыларға да жәрдемдесті. Олардың әлеуметтік-тұрмыстық мәселелерінің оң шешілуіне атсалысты. Республикалық «Ұстаз жолы» қоғамдық қоры ағамыздың жас ұрпақты тәрбиелеудегі және қоғамдық жұмыстарға белсене қатысқан еңбегін елеп, қордың «Еңбек даңқы» орденімен марапаттады. Бұл орденді бөлімше басшысы кеудесіне тақты.