ҚТЖ: екпе алуды ұйымдастыруда

Үстіміздегі жылы 29-30 маусым күндері «Қазақстан темір жолы» ұлттық компаниясы бас ғимаратының медициналық кабинетінде ерікті түрде вакцина салу процедурасы өтті. Онда компанияның орталық аппараты мен еншілес теміржол кәсіпорындарынан келген қызметкерлер кезекке тұрып екпе алды. Вакциналау екі күн бойы екі пунктте қатар жүргізілді. Таңғы сағат 09:00-де басталып, 14:00-де аяқталған медициналық шарада алпыстан астам адам вакцина салдырды. Оларға таңдауына қарай екпенің 3 түрі ұсынылды. Олар – Спутник, Hayatvax, Coronavac вакциналары.

«Өзіміз келген екі күнде 68 адам егілді. Олардың көбі Hayatvax вакцинасын салдырды. 10 адам Спутник V-ді салдырды. Бір адам ғана Coronavac алды. Екпе салар алдында барлығының жағдайлары тексеріліп, қан қысымдары өлшенді. Барша пациенттерге әуелі тамақ ішіп келу қажеттігін ескерттік. Сұхбаттасу барысында соңғы жарты жылда ковидпен ауырғандар кейін қайтарылды. Ал вакцина салдырған адамдар жарты сағат дәрігерлердің бақылауында болды», – дейді «Медикер» медицина орталығының дәрігері Қарлығаш Байтөлекова.

Бұл теміржол саласы қызметкерлері арасында ұйымдастырылып отырған алғашқы шара емес. Бұған дейін де өңірлік филиалдар мен еншілес компанияларда еркін вакцинациялау жүргізіліп, көшпелі егу пункттері ұйымдастырылған болатын. – Әлемді жайлаған індетпен күресте өзімізді және жақындарымызды аурудан сақтаудың басты жолы – вакцина. Біз бәріміз екпе салдырып, ұжымдық иммунитет қалыптастырсақ қана бұл жағдайдан шыға аламыз. Сондықтан өзім бүгін Hayatvax екпесін алдым. Вакцинаның еш жағымсыз әсерін сезіп тұрған жокпын, – дейді «ҚТЖ» ҰК» АҚ Жол және құрылыс департаментінің басқарма басшысы Айдос Майқыбеков. Медициналық шара бүгін де жалғасуда, алдағы апталарда да компания қызметкерлері толық екпемен қамтылғанға дейін жүргізіле бермек.