Нұр-Сұлтан станциясында бензин құйылған 4 цистерна рельстен шығып кетті
«Қазақстан теміржолшысы» газетінің тілшісі
Нұр-Сұлтан станциясы іргесінде бензин құйылған 4 цистерна рельстен шығып кетті. Абырой болғанда зардап шегушілер жоқ. 28 маусым күні сағат 13:30-да елорда іргесіндегі «Өндіріс» теміржол станциясынан бензин құйылған 4 цистернаның рельстен шығып кеткені туралы хабар түскен. Оқиға орнына дереу қалалық Төтенше жағдайлар департаментінің қызметкерлері келіп жетті. Төтеншеліктер бензин құйылған 4 цистернаның рельстен шығып кеткенін көрді. Алайда, бензин төгілмеген, цистерналар да аударылмаған. Төтенше жағдайлар департаменті баспасөз қызметінің хабарлауынша, оқиға орнында тиісті жұмыстар жүргізіліп жатыр. Электр желілері жинақталып, жедел штаб құрылды. Оқиғаның салдарымен жұмысқа жеке құрамнан 25 адам, 4 арнайы техника жұмылдырылды. Сонымен қатар Нұр-Сұлтан Төтенше жағдайлар департаментінің өртпен күрес бекеттері орнатылды.