Таяуда тағайындалған ҚТЖ басшысының 1-ші орынбасары елордадағы нысандарға барды

«Қазақстан темір жолы» ҰК» АҚ Басқарма төрағасының трансформация және цифрландыру жөніндегі бірінші орынбасары Әнуар Ахметжанов астаналық станция, вагон пайдалану және локомотив депосы жұмысымен танысты, деп хабарлайды Rail-news.kz. Теміржол нысандарына жұмыс сапары қауіпсіздік техникасы бойынша нұсқаулықтан басталды. Аталған құрылымдық бөлімшелердің бизнес-процестерімен «ҚТЖ-Жүк тасымалы» ЖШС бас директорының орынбасары Қанат Көбесов таныстырды. Алдымен ат басын астаналық станцияға бұрды. Нұр-Сұлтан станциясы – елдің бас қаласын барлық өңірлермен байланыстыратын кластан тыс ірі сұрыптау станциясы. Ол арқылы ТМД, Еуропа және Азия елдері арасында жүк жеткізетін негізгі транзиттік дәліздер өтеді. Әнуар Ахметжанов дөңестік орталықтандыру бекетінің, станциялық технологиялық орталықтың, тауарлық кассаның, бағыттамалар мен белгі беруші электрлік орталықтандыру бекетінің жұмыс технологиясымен танысты. Бұдан кейін ол вагон депосына қарасты техникалық тексеру пунктінің өндірістік цехтарын аралап, жылжымалы құрамды деполық жөндеуден өткізу процесімен танысты. Локомотив депосында топ- менеджерге пойыздардың тартымына жұмсалатын отын-энергетикалық ресурстардың нақты есебін жүргізуге мүмкіндік беретін «Энергодиспетчерлік тартым» автоматтандырылған басқару жүйесінің қызметі көрсетілді. Астаналық депода жұмыс істейтін 650-ден астам машинист пен машинист көмекшілері төрт бағытта, Нұр-Сұлтан – Есіл, Нұр-Сұлтан – Көкшетау, Нұр-Сұлтан – Екібастұз, Нұр-Сұлтан – Қарағанды бойынша жүктер мен жолаушыларды жеткізіп, пойыздардың қозғалыс қауіпсіздігін қамтамасыз етуге атсалысады.