Жаңа жыл қарсаңында «Нұрлы жол» вокзалында тәулігіне 9 мыңға жуық адамға қызмет көрсетілді
2021 жылдың соңында Жаңа жыл қарсаңында елордадағы «Нұрлы жол» вокзал кешенінде тәулігіне 8800-9000 жолаушы мен келушілерге қызмет көрсетілді, деп хабарлайды Rail-news.kz.
Кешен қызметкерлерінің айтуынша, тура жаңа жыл түнінде жолаушылар ағыны азайып, 5 мың адамға түскен. Себебі халықтың көбі 30 желтоқсанда жолға шыққан. Ал 1 қаңтарда 7315, 2 қаңтарда 7605 және 3 қаңтарда 9428 адам вокзалға келіп кеткен.
31 желтоқсанда әдеттегідей 3 ауысымда вокзал қызметкерлері жұмысқа шығып, жолаушыларға қызмет көрсеткен. Олардың ішінде кезекшілерден бөлек клинингтік компания өкілдері, өрт қауіпсіздігі мамандары және билет кассалары қызметкерлері де бар. Бұл күні вокзалдан барлығы бес пойыз жөнелтіліп, төрт пойыз қабылданған.
Жолаушылар елордадан Арқалық, Алматы, Көкшетау, Семей, Атбасар бағытына сапарға шығып, бас қалаға Шымкент, Көкшетау, Арқалық жақтан келді. Алып ғимарат кешені арқылы сапарға шыққан халықтың көңіл-күйі жоғары болып, вокзалдың әлеуметтік желідегі парақшаларында алғыс пен Жаңа жылдық құттықтау лебізін жолдағандар көп болды.