Былтыр транзиттік контейнерлік тасымал рекордттық көрсеткішке жетті
«Қазақстан теміржолшысы» газетінің тілшісі
«KTZ Express» АҚ-ның 2021 жылдағы жұмыс қорытындысы бойынша өткен жылы транзиттік контейнерлік тасымал көлемі бұрын-соңды болмаған ең жоғары көрсеткішке жетті.
Қазақстан арқылы барлық бағдарлар бойынша транзиттік контейнерлік тасымал көлемі жылдық рекордтық – 1 млн ЖФЭ-ден астам көрсеткішке көтерілді. Пайызға шаққанда алдыңғы жылдың сәйкес кезеңімен салыстырғанда бұл 22 пайызға көп.
Бір айта кетерлігі, Қытай-Еуропа-Қытай бағдары бойынша тасымал көлемі бір жылға 662 мың ЖФЭ-ні құрады, бұл 2020 жылдың сәйкес кезеңіне қарағанда 32% артық. Қытай-Ресей-Қытай бағдары бойынша тасымал көлемі 69 мың ЖФЭ-ден асты, өсім 28%. Ақтау теңіз сауда порты арқылы тасымал жүргізетін Мультимодальды Транскаспийлік халықаралық көлік бағдары бойынша тасымал көлемі 14 мың ЖФЭ-ден артып, өсім 88 пайызды құрады.
Қаржылық көрсеткіштері жағынан «KTZ Express» оң қаржылық нәтижеге қол жеткізді: соңғы жылдары бірінші рет табыс жоспардан бірнеше есе асып түсті, операциялық табыс та солай еселенді.
«KTZE 2022 жылға тасымал көлемі мен табысты арттыру, ең бір жаңа ІТ құралдарды енгізу бойынша стратегиялық мақсаттар мен биік міндеттер қояды. Соның ішінде бизнес-үдерістерді автоматтандыру және клиенттермен өзара іс-қимыл, сервистер желісін кеңейту, логистиканың тиімді үлгілерін жүзеге асыру да бар», – деді «KTZ Express» АҚ басшысы Нұрлан Игембаев.