«Қала маңы тасымалы» былтыр шамамен 2 млн астам жолаушыға қызмет көрсеткен
«Қазақстан теміржолшысы» газетінің тілшісі
Қазақстанда қала маңы тасымалы – халық арасында көліктің ең сұранысқа ие танымал түрі, солай болып қала да береді. «Жолаушылар тасымалы» АҚ «Қала маңы тасымалы» филиалының директоры Сұлтан Табынбаев осы бағыттағы жұмыстар туралы баяндап берді, деп хабарлайды Rail-news.kz.
Кәсіпорын басшысының айтуынша, бүгінгі таңда аталған филиал 59 бағдарда жолаушылар тасымалын жүзеге асырады. Соның ішінде 7 бағдар бойынша тапсырыс беруші – ҚР Индустрия және инфрақұрылымдық даму министрлігі, бұл пойыздар облыстар арасында қатынайды. Мәселен, Нұр-Сұлтан станциясынан шығатын электр пойыздар құрамын филиал толық қамтамасыз етеді, атап айтқанда Павлодар, Көкшетау, Атбасар, Қарағанды қалаларына дейінгі барлық бағыт бойынша жолаушылар тасымалы қажеттілігін өтеп отыр.
Соңғы екі жылда ел экономикасы және бірқатар салалар, соның ішінде көлік саласы коронавирус пандемиясына байланысты сын-қатерге ұшырады. Егер 2019 жылы аталған филиал 3 460 486 жолаушы тасымалдаған болса, 2020 жылы ол іс жүзінде екі есе азайып, 1 799 149 жолаушыға түсті. 2021 жылы қайта жанданып, жолаушылар ағыны 2,2 млн адамнан асты. Биыл да артып келеді. Бір ғана Наурыз мейрамы кезінде филиал республика бойынша шамамен 58 мың жолаушыны тасымалдаған. Әрине, бұған ауа-райының қолайсыздығы, қарлы боранның кесірінен автожолдардың жабылып қалғаны да әсер етті. Мұндай жағдайлар қыс пен көктем айларында жиі болып тұрады. Сол себепті алдын ала шаралар қабылданып, электр пойыздарға қосымша вагондар қосылған, ауа-райы нашарлаған сол күндері жолда қалған жолаушының көбін қала маңы тасымалы жеткізген.
Айтуынша, бүгінде елорда аумағында жолаушылар тасымалын қамтамасыз ету үшін электр пойыздардың жұмыс паркінде 17 құрамда 123 вагон бар. Соның ішінде 15 құрамды филиал «Вагонсервис» АҚ-дан, ал 2 құрамды басқа жеке компаниядан жалға алады.
Адамдардың қимыл-қозғалысы шектеулі топтарына қолайлы болу үшін елорданы Қарағанды, Көкшетау және Атбасармен байланыстыратын 4 электр пойызында мүмкіндігі шектеулі жандарды түсіріп-мінгізуге арналған көтергіштер орнатылып, арбада отыратын мүгедектерге арналған орындар бөлінген, олар қауіпсіздік белдіктері, арбаны бекіту құрылғылары, жолсерікті шақыру тетіктерімен қамтылған. Ал көзі нашар көретін жолаушылар үшін Брайль қарпімен жазылған ақпараттық тақтайшалар орнатылған.
Филиал басшысы шешімін күткен мәселелерімен де бөлісті. Айтуынша, 2022 жылдың соңында 10 вагонның, келесі жылы 8 вагонның жарамдылық мерзімі бітеді. Осыған орай «ҚТЖ» ҰҚ» АҚ және «Жолаушылар тасымалы» АҚ басшылығы тарапынан қазіргі таңда әлеуетті электр жылжымалы құрам өндірушілерді іздеу және оларды сатып алу жолдары қарастырылуда екен.