Атырау-Астрахан пойызы қайта жүре бастады
Атырау облысы бойынша меншікті тілші
Қазақстан мен Ресей теміржол әкімшіліктері арасындағы келісімге сәйкес сәуірдің 20-нан бастап «Атырау-Астрахань» қатынасындағы халықаралық жолаушылар пойызы қалпына келтірілді, деп хабарлайды Rail-news.kz
Пандемияға байланысты көршілес екі ел аралық шекара учаскесіндегі қозғалысты шектеу туралы шешімнің күші жойылды. Осыған дейін пойыз тек Қазақстан территориясында, шекараға дейін, яғни ең соңғы Дина Нұрпейісова станциясына дейін қатынап келген еді. «Жолаушылар тасымалы» АҚ Атырау телімінің бастығы Әлмұқан Есқалиевтің айтуынша, №625-626 «Атырау-Астрахань» пойызы жергілікті уақыт бойынша 22-45-те Атыраудан аттанып, Астраханьға таңғы 8-де барады. Пойыз Атыраудан жұп күндері, ал кері қарай тақ күндері жүреді. «Пойыз құрамында 7 вагон бар, оның төртеуі – Маңғыстаудан келе жатқан вагондар. Ал бізден 3 вагон: 1 купе, екі плацкарт вагон қосылады. Жолаушыларға қызмет көрсететін жолсеріктер саны 14-18 адам аралығында. Астраханьға қатынас тоқтаған кезде де бізде жұмыссыз отырған жолсерік болған жоқ, енді сол бұрынғы мамандар өз маршруттарына қуана-қуана қайта оралып жатқан жайы бар», – дейді телім бастығы.
Бірақ жолаушыларға пойызға мінудің өзіндік тәртібі бар екен. Коронавиурсқа қарсы егілмеген жолаушылар ПЦР-тест тапсыруы керек, оның мерзімі 72 сағаттан кем болмауы тиіс. Ал вакцинациядан өткендеріне 6 ай болмағандар үшін анықтама қажет емес. Пойыз жолда 11 станция, 16 разъезге тоқтайды.