Ресейге пойыздар қайтадан қатынай бастады

Алдағы маусым айынан бастап үш мемлекетаралық пойыз Ресей Федерациясына қатынайтын болады. Олар Қарағандыдан Омбыға, Алматы-2 станциясынан Қазан қаласына және үшіншісі Қарағанды-Мәскеу бағытында жүрмек, деп хабарлайды Rail-news.kz.

Сонымен, Қарағандыдан жөнелтілетін «Қарағанды-Омбы» бағытындағы №145/146 пойызы 2022 жылғы 3 маусымнан бастап жұма және сейсенбі күндері жолға шығатын болады. Кері бағытта құрам 2022 жылғы 4 маусымнан бастап сенбі және сәрсенбі күндері Омбыдан Қарағандыға шыға бастайды. Ал «Алматы-2-Қазан» бағытындағы №113/114 пойызына келсек, ол Алматыдан 2022 жылдың 6 маусымынан бастап дүйсенбі күндері жөнелтіледі. Қазаннан Алматыға қарай 2022 жылғы 9 маусымнан бастап бейсенбі күндері кері жүре бастамақ. Көмір кен орнынан шығатын келесі бір құрам – «Қарағанды-Мәскеу» қатынасындағы №83/84 пойыздың қатынауы Самара станциясына дейін қысқарады. Ол Қарағандыдан 2022 жылғы 8 маусымнан 30 шілдеге дейін жұп күндері жүретін болады. Құрам Омбыдан Қарағандыға 2022 жылғы 10 маусым мен 30 шілде аралығында жұп күндері қатынайды. Сонымен қатар, 1 тамыздан 31 тамызға дейін осы пойыз Қарағандыдан Самараға және Самарадан Қарағандыға тақ күндері жүреді деп жоспарлануда. Ағымдағы жылдың 2 қыркүйегі мен 30 қазаны аралығында пойыз Қарағанды мен Самарадан жұп күндері қатынайтын болады. Ал, 1 қарашадан 9 желтоқсанға дейін пойыз Қарағандыдан Самараға тақ күндері қатынаса, Самарадан Қарағандыға пойыз тақ күндері 1 қарашадан 11 желтоқсанға дейін қатынамақ. Жолаушылардың назарына, билеттердің құны мемлекетаралық тариф бойынша белгіленгенін, ал жолаушылар пойыздарының қозғалыс кестесі бойынша анықтамалық ақпаратты «1433» нөмірі бойынша және жол жүру құжатының бағасын www.bіlet.railways.kz. сайтынан алуға болатынын еске саламыз.

Биыл 27 сәуірде ведомствоаралық комиссия ҚР аумағында коронавирустық індеттің пайда болуы мен таралуына жол бермеу жөнінде шешім қабылдаған болатын. Осы орайда, «Қазақстан Республикасының Мемлекеттік шекарасы арқылы өткізу пункттеріндегі шектеу іс-шаралары туралы» ҚР Бас мемлекеттік санитарлық дәрігерінің 29.04.2022 жылғы №21 қаулысында жазылған талаптардың сақталуы міндетті. Сонымен қатар қазақстандықтар мен шетел азаматтарының елге теміржол көлігімен кіруі үшін бұрынғыдай теріс нәтижесі бар COVID-19-ға қарсы ПТР тестілеуден өткені туралы анықтаманың болуы міндетті. Оны берген күннен бастап ҚР Мемлекеттік шекарасын кесіп өткен сәтте 72 сағаттан аспауы тиіс немесе ҚР Бас мемлекеттік санитарлық дәрігерінің қаулысына сәйкес ҚР аумағында жарамды деп танылған коронавирустық індетке қарсы екпе алуы немесе қайта вакцина қабылдауының толық курсынан өткені (соңғы дозаны алғаннан кейін 6 айдан аспайтын мерзім) туралы паспорт ұсынуы қажет. Егер жолаушыларда ПТР тестінің нәтижелері болмаса немесе COVID-19 қарсы екпенің паспорты болмаса, вагонға отырғызуға жіберілмейді.

Теріс нәтижесі бар COVID-19-ға ПТР тестілеуден өткені туралы анықтаманы ұсыну келесі адамдардан: айталық, 5 жасқа дейінгі балалардан, егер оларды алып жүретін адамдарда осындай анықтама болған жағдайда; ҚР үкіметтік делегацияларының мүшелерінен; локомотив бригадаларының мүшелерінен, теміржол, теңіз және өзен көлігіндегі тасымалдау қызметімен байланысты адамдардан; егер екінші компонентті алғаннан кейін ҚР шекарасын кесіп өту сәтінде алты айдан аспаған болса, ҚР-да ревакцинацияны немесе COVID-19-ға қарсы вакцинациялаудың толық курсын алған адамдарға құжаттық растауды ұсынған кезде; ҚР Бас мемлекеттік санитарлық дәрігерінің қаулысына сәйкес ҚР аумағында жарамды деп танылған, COVID-19-ға қарсы вакцинация туралы паспорт/сертификат/анықтама ұсынған адамдардан талап етілмейді.