Жаз кезінде шамамен 200 қосымша жолаушылар вагоны шығарылмақ
«Қазақстан темір жолшысы» газетінің тілшісі
Жазғы маусым – теміржол көлігін пайдаланатын жолаушылар нөпірінің көбейетін кезеңі. Осыған орай, «Жолаушылар тасымалы» АҚ биылғы жаз маусымына 1200-ге жуық вагон дайындап іске қосса, бұдан бөлек орын жетіспеушілігі туындаған кезде қосылатын тағы 200-дей вагонды әзірлеп отыр.
Соның бірі, жақында «Жолаушылар тасымалы» АҚ Тальго вагондарынан құрастырылған № 211/212 және № 453/454 «Алматы-2 – Достық» қатынасындағы екі жолаушылар пойызының тағайындалуы. Бұл құрамдар Алакөл бағытында қатынайтын болады. № 211/212 пойызының қатынау жиілігіне келсек, Алматы-2 станциясынан құрам Достық станциясы бағытында биыл 16 маусымнан 30 тамызға дейін жұп күндері жүретін болса. Достық станциясынан Алматыға пойыз 17 маусымнан 31 тамызға дейін тақ күндері қатынайды.
№453/454 пойызы Алматы-2 станциясынан осы жылғы 16 маусымнан 30 тамызға дейін сейсенбі, бейсенбі және жексенбі күндері жолға шығады. Достық станциясынан Алматыға құрам 17 маусымнан 31 тамызға дейін дүйсенбі, сәрсенбі және жұма күндері жүреді. Жоғарыда көрсетілген жолаушылар пойыздарының құрамында «Турист» класы бойынша 4 орындық купеден тұратын 12 вагон, «Бизнес» класында 2 орындық купеден тұратын 3 вагон, «Гранд» класында 2 орындық купеден тұратын 3 вагон бар. Әр купе жеке санитарлық тораппен және душпен жабдықталған.
Сонымен қатар, жолаушылардың жайлылығын қамтамасыз ету үшін пойызда кафе-вагон және мейрамхана-вагон бар. Барлық вагондар фильмдер, музыкалық клиптер, электронды кітаптарды көруге арналған мультимедиялық порталмен жабдықталған және де биодәретханалар мен ауа баптау жүйелері бар. Жалпы, жаңа пойызды қосқанда Алакөл бағытына 11 пойыз қарастырылған, оның ішінде «Жолаушылар тасымалы» АҚ – 9, жеке тасымалдаушылар 2 пойыз шығарып отыр. Таратып айтсақ, Нұр-Сұлтаннан – 3 пойыз, Алматыдан – 5 пойыз, Шығыс Қазақстан облысынан – 1 пойыз, Абай облысынан – 1 пойыз, қаламаңы – 1 пойыз қатынайды.
Ұлттық тасымалдаушы жолаушылардан жол жүру құжаттарын, яғни билеттерін BILET.RAILWAYS.KZ сайты немесе «ҚТЖ билеттері» мобильді қосымшасы арқылы онлайн ресімдеуді сұрайды. Орын болмаған жағдайда жолаушыларға темір жол билеттерін сатып алу үшін «Күту парағы» функционалын пайдалану ұсынылады.