Дисконттық карталардың жолаушылар үшін тиімділігі зор

Үстіміздегі жылдың бес айында «Жолаушылар тасымалы» АҚ жасақтаған пойыздармен 5 миллион 212 мың жолаушы тасымалданған. Халықты сапалы әрі қолжетімді көлікпен қамтамасыз етуді мақсат етіп отырған ұлттық тасымалдаушы уақыт талабына сай сервистік қызмет көрсету сапасының жетілдіріп келеді.

Әрине, жолаушылар тасымалын ұйымдастыру барысында билет сату жүйесінің орны ерекше. Осы орайда «Жолаушы тасымалы» компаниясының технологиялық мүмкіндіктері арқасында бүгінде халықтың басым бөлігі, вокзал жеке билет кассаларының табалдырығын тоздырмай, билетті үйден шықпай-ақ рәсімдей береді. Мәселен, 2022 жылдың 5 айында 8 543 909 электрондық билет сатылса, соның 70% немесе 5 930 492-сі онлайн ресімделген. «Күту парағы» қызметін қолданушылар қатары да жылдан жылға көбейіп келеді екен. Айталық, бес ай ішінде бұл қызмет алаңына 97 мыңға жуық өтінім келіп түсіп, оның 66 мыңнан астамының сұранысы қанағаттандырылған. Бірақ нақты сатып алынған билет саны 34 мыңнан асқан екен. Демек, күту парағына тапсырыс бергендердің дені жеме жемге келгенде шыққан билетті сатып ала бермейді деген сөз.

Қалай десек те, осындай заманауи технологияларды енгізу арқылы адамдардың алтын уақытын үнемдеуге жағдай жасаған «Жолаушылар тасымалы» компаниясы биыл да бірқатар сервис түрлерін қайта жандандырып, халықты жақсы жаңалықтармен қуантып отыр. Айталық, 2022 жылдың 15 маусымынан бастап әлеуметтік маңызы бар бағыттарға, яғни маусым айындағы жағдай бойынша 38 маршрут бойынша пойызбен жиі саяхаттайтын жолаушыларға жаңа «Күміс» дисконттық картасының іске қосылуы. Бұл карта билет құнының 25% үнемдеуге мүмкіндік береді. Құны 7999 теңге тұратын картаның жарамдылық мерзімі – іске қосылған сәттен бастап бір жыл.  

– «Күміс» дисконттық картасы – дербес, яғни сатып алушы адамның ғана атына тіркеледі. Картаны «Жолаушылар тасымалы» АҚ-ның билет кассаларынан және билеттерді офлайн/онлайн сатып алу кезінде де пайдалануға болады. Жоба пилоттық болғандықтан, карталар саны шектеулі. Барлық қосымша ақпаратты «Жолаушылар тасымалы» АҚ билет кассаларында дисконттық картаны ресімдеу және сатып алу кезінде нақтылауға болады. Осы ретте, темір жол билеттерін сатып алу және ресімдеу кезінде жеңілдікке ие жолаушыларға «жеңілдік» және «баға шегерімі» санатын дұрыс таңдауға кеңес берер едік, – дейді «Жолаушылар тасымалы» АҚ сату және клиенттермен жұмыс жүргізу департаментінің директоры Ерлан Жимайлов. 

Ол сонымен қатар «Алтын», «Саяхатшы» және «Жастар» дисконттық карталарының да қолданысқа енгізіліп, жолаушылардың пайдалана бастағанын атап өтті. Бұл карталардың ерекшелігі неде дейтін болсақ, бағасы 19999 теңгені құрайтын және билет құнынан 25% шегерім жасауға мүмкіндік беретін «Алтын» дисконттық картасы «Жолаушылар тасымалы» АҚ-ның барлық пойыздарына жарамды. «Жастар» картасы 16 – 25 жас аралығындағы жолаушыларға арналып, бағасы 3000 теңгені құрайды. Бұл дисконттық карта «Тальго» коммерциялық пойыздарының «Турист» (2Д) және «Отыру орындары» (2С) санаттарына 25% жеңілдікпен билет сатып алу мүмкіндігін береді. «Жолаушылар тасымалы» АҚ ұсынып отырған «Саяхатшы» тегін дисконттық жинақтаушы картасы бойынша жеңілдіктер мөлшері, коммерциялық бағдарлар бойынша соңғы 12 ай ішінде жолаушылар пойыздарындағы жалпы іссапар бағасына байланысты болмақ. Яғни, дисконттық картада жинақтаған сомасы 100 000-нан 150 000 теңгеге дейін болса, жеңілдік мөлшері 10%, 150 000-нан 200 000 теңгеге дейін – 15%, 200 000 теңгеден жоғары – 20% құрамақ. Бұл карталарды да «Жолаушылар тасымалы» АҚ-ның теміржол вокзалдарында орналасқан билет кассаларынан сатып алуға болады.