Жолаушы тасымалы жаңа пойызбен толықты

Жексенбі күні «Жолаушылар тасымалы» АҚ қарасты Тальго вагондарынан жасақталған «Нұр-Сұлтан–Нұрлы жол–Алматы-2» бағытындағы №204/203 коммерциялық жолаушылар пойызы жолға шықты, деп хабарлайды Rail-news.kz.

Пойыз Нұр-Сұлтан–Нұрлы жол станциясынан 17 шілдеден бастап тақ күндері жөнелтілетін болса, Алматы-2 станциясынан 18 шілдеден бастап жұп күндері жүретін болады. 

Коммерциялық пойыз отандық «Тұлпар» зауыты өндірісінен шыққан су жаңа 26 вагонмен жасақталған. Оның ішінде 17 вагон немесе 306 жатын орындар туристік кластағы вагондар болса, 216 орындық 6 вагон отырып баруға арналған. Екі адамдық бизнес дәрежесіндегі 24 орынға есептелген 2 вагон және бірінші дәрежелі жатын орынды купеде мүмкіндігі шектеулі жандарға арналған 1 орын бар. Сонымен қатар бір-бірден вагон-бар, вагон-мейрамхана және жүк-багаж вагондары бар.

– Бұл пойыздың вагондары бұрынғы испандық вагондарға қарағанда кең, яғни ені 3200 мм, ал биіктігі 3524 мм. Ішкі құрылымы мен интерьері де қауіпсіздікті, жолаушылардың жүріп-тұруына қолайлы жағдайларды, қызмет көрсететін персоналдың жұмыс істеу және демалу мүмкіндігін, қол жүгін ыңғайлы және қауіпсіз орналастыруды қамтамасыз етеді. Туристік және бизнес-класс вагондары жолсерікті шақыру түймесі, дыбыс деңгейін реттейтін дауыс зорайтқыш, 220 В электр розеткасымен және мультимедиялық порталмен жабдықталған. Порталда жолаушылар фильмдер тамашалап, ал балалар мультфильм, ойындар көре алады. Барлық вагондарда желдеткіш, биотуалеттер бар. Мүгедектерге арналған купесі бар бірінші класты жатын вагондары душ кабинасы санитарлық тораппен, тұрақты және тасымалданатын сатымен, жиналмалы үстелмен, температураны жеке бақылауға арналған құрылғымен, төмен платформаларға шығуға арналған лифтпен жабдықталған. Нұр-Сұлтаннан аттанып бара жатқан пойызда жолаушыларға 28 жолсерік қызмет көрсетеді. Пойыздың жол үстіндегі жүру уақыты 15 сағатты құрайды, – деді «Жолаушылар тасымалы» АҚ бас директоры Жәнібек Тайжанов.  

Ұлттық тасымалдаушы жолаушылардан жол жүру құжаттарын, яғни билеттерді BILET.RAILWAYS.KZ сайты немесе «ҚТЖ билеттері» мобильді қосымшасы арқылы онлайн ресімдеуге кеңес береді. Вагонда орын болмаған жағдайда теміржол билеттерін сатып алу үшін «Күту парағы» функционалын пайдаланған абзал. Сондай-ақ, әртүрлі сұрақ туындаған жағдайда 1433 нөміріне немесе Instagram әлеуметтік желісі арқылы хабарласуға болады.