Ардагерлер жыл соңына дейін еліміздің пойыздарында тегін жүре алады
"Жолаушылар тасымалы" АҚ ел аумағында тұратын Ұлы Отан соғысының қатысушылары мен мүгедектеріне, тыл еңбеккерлеріне және еңбек майданына қатысушыларға темір жол көлігімен тегін жүру акциянсын қайта іске қосты, деп хабарлайды Rail-news.kz.
Акция 2022 жылдың 31 желтоқсанына дейін жарамды.
«Оның мақсаты - Қазақстан Республикасында тұратын, 1935 жылғы 31 желтоқсанға дейін туған Ұлы Отан соғысының қатысушылары мен мүгедектерін, тыл еңбеккерлерін және еңбек майданы қатысушыларын әлеуметтік қорғауды арттыру», -дейді "Жолаушылар тасымалы" АҚ-ның баспасөз қызметі.
"СВ", "Гранд", "Бизнес" вагондардан басқа "Talgo" компаниясының вагондарынан құралған пойыздарда барлық санаттағы вагондар мен пойыздарда, оның ішінде Тәуелсіз Мемлекеттер Достастығы шегінде, "Турист" (купе) класты вагондарда және мүмкіндігі шектеулі адамдарға арналған мамандандырылған купеде тегін жол жүру көзделген.
Тегін жол жүру құжаттарын ресімдеу үшін "Жолаушылар тасымалы" АҚ билет кассасына ҚР азаматының жеке басын куәландыратын құжатты, сондай-ақ Ұлы Отан соғысының қатысушысы мен мүгедектік куәлігі, тыл еңбеккері және еңбек майданының қатысушысы ретінде арнайы мемлекеттік жәрдемақы тағайындау туралы уәкілетті органның белгісі бар зейнетақы куәлігін ұсыну қажет. ТМД елдеріне аттанар кезде тегін жол жүру үшін жол жүру құжаттары Қазақстан Республикасының аумағында орналасқан сату пункттерінде ғана ресімделеді.