Астанадан Ұлытауға пойыз жүре бастады
«Қазақстан теміржолшысы» газетінің тілшісі
Жаңадан құрылған Ұлытау облысына бұған дейін Алматыдан пойыз жүре бастаса, 16 қыркүйектен бастап астанадан да жаңа құрам жолға шығады, деп хабарлайды Rail-news.kz.
Бас қаладан Жезқазғанға жаңа №65/66 жолаушылар пойызы аттанады. Жолаушылар пойызы екі күнде бір жүреді, яғни жұп күндері – Нұр-Сұлтаннан, тақ күндері Жезқазғаннан кері бағытта қатынайды. Talgo вагондарынан құрылған пойызда 344 орын бар. Вагондар ауа баптау жүйесімен және биоәжетханалармен жабдықталған. Әр купеде электр розеткалар жұмыс істеп тұр. Сонымен қатар жолаушылар жол бойында Vputi. kz мультимедиялық порталында фильм көріп, музыка тыңдай алады. Сондай-ақ, вагон-мейрамхана қызметін пайдалануға болады. Душ кабиналары тек Grand және Grand PMR класындағы вагондарда қарастырылған.
«Жолаушылар тасымалы» АҚ №65/66 Нұр-Сұлтан-Нұрлы жол – Жезқазған пойызына билеттер сатылымы басталғанын хабарлайды.