Германияда «Идеялар пойызының» жаңа нұсқасы шықты
Берлинде өткен InnoTrans 2022 көлік технологиялары көрмесінде DB Regio компаниясы Südostbayernbahn жолаушылар операторына деп жасап шыққан екі қабатты «Идеялар пойызын» таныстырды, деп хабарлайды Rail-news.kz.
Аталған көрмеде әлемдегі ең озық темір жол техникалары таныстырылды. Солардың бірі немістер жасап шыққан «Идеялар пойызы» (Ideenzug). Бұл пойыздың атауы айтып тұрғандай, жолаушыға жол-жөнекей ноутбугімен жұмыс істеуіне барлық жағдай жасалған, тіптен кішігірім топтардың конференция өткізуіне де ыңғайлы.
Бұрынғысынан жетілдіріліп, қайта жасақталып шыққан бұл вагондар 2023 жылдың көктемінде Мюнхен мен Мюльдорфом‑на‑Инн қалалары арасында қатынайтын болады.
Жаңадан жасалған «Идеялар пойызына» енгізілген негізгі 10 өзгеріске тоқталып өтсек:
1. Бірінші дәрежелі купенің бір адамдық орнында сырғыма есік қойылған, ыңғайлы орындық, үстел және жолаушы ноутбукты қоса алатын 27 дюймдік мониторы бар. Бұл жерде алаңсыз жұмыс істеуге және телефон арқылы іскерлік келіссөздер жүргізуге бар жағдай қарастырылған. Купені саяхат кезінде демалу үшін де пайдалануға болады, яғни креслоның артын жазып, ұйықтай бересің.
2. Отбасылық орында ыңғайлы әрі кең екі орындық пен шағын үстел қойылған, оған қоса киім, қол арба және баламен жүргендердің жүгін қоятын орын бар.
3. Сондай-ақ үстел үстінде әңгімелесіп отыруға арналған орын да қарастырылған. Шағын топ болып, жол жүріп бара жатқан адамдар мұнда жұмыстарын талқылап, тіптен конференция өткізе алады. Ол жерде үстелдің екі жағына жылжымалы орындықтар және төрге үлкен экран қойылған. Экраннан күннің өзекті жаңалықтарын тыңдауға болады немесе жұмыс барысында жеке мәліметтер дерегін енгізіп пайдалана аласыз.
4. Релаксация аймағы. Мұнда ыңғайлы орындықтар қойылған және үлкен терезеден сырттағы пейзажды тамашалауға болады. Бір сөзбен айтқанда жол бойындағы әсем табиғатты кең терезеден көріп отырып, қиыл мен арманға ерік бересіз.
5. Релаксация аймағының бір шетіне бұрышты диван қойылған. Бұл бірнеше адам болып жол жүріп бара жатқан жолаушылар үшін қолайлы. Сондай-ақ диванның астында жүк қоятын орын жеткілікті.
6. Пойыздың тағы бір ерекшелігі ашық купе тектес орындарының болуы. Бұл да 5-6 адам болып жолға шыққандар үшін ыңғайлы.
7. Ашық купедегі орындықтар ерекше дизайнда жасалған және тысы мата жабындымен қапталған. Бұл орындықтар арқаны сүйеп отырғанға өте ыңғайлы. Купенің ішіне қойылған желдеткіш сіздің сапарыңызды одан сайын жайлы ете түседі.
8. Пойыздағы жолаушыларды ақпараттандыру жүйесі де жетілідірілген, кіру есіктерінің үстіне пішіні үлкен мониторлар қойылған. Бұл мониторға пойыздың кестесі, келесі станциядағы инфрақұрылым, вагондар саны және ондағы бос орындардың болуы туралы жедел ақпараттар шығып тұрады. Екі қабатты вагонның ішінде 20 монитор қойылған, олардың кейбірі терезе әйнегімен біріктірілген.
9. Ашық купедегі орындықтардың жақтауы келесі купемен араны қалқалап тұрады, бұл сапар кезіндегі жолаушылардың өзін жайлы сезінуін қамтамасыз етеді. Оған қоса мұндай орындықтарды жоғары, төмен түсіріп, өзіңіздің қалаукыңызға қарай реттеуге болады.
10. Кең көпфункциональды аймақ балалардың қол арбасын, шаңғы және басқа да жүктерді қоюға ыңғайлы етіп жасалған. Сондай-ақ қабырғаға жиналмалы үш орындық қойылған.
Айта кетсек, «Идеялар пойызы» смартфон мен планшетті қуаттайтын 100 USB тоқ көзімен қамтылған. Жолаушылар үшін 5G мобильді радиобайланысы орнатылған.