Ұлттық тасымалдаушы фирмалық пойыздар санын екі есеге арттырды
«Жолаушылар тасымалы» АҚ 2023 жылғы 10 ақпаннан бастап «Маңғыстау-Семей» қатынасындағы №37/38 және «Алматы-Маңғыстау» бағытында жүретін №77/78 жолаушылар пойыздары «фирмалық» мәртебесімен жүретінін хабарлайды.
Бұл пойыздарда әр жолаушыға арналған жеке гигиеналық жиынтық: тіс щеткасы, паста, сабын, дымқыл майлық, тарақ және аяқ киім қалақшасы бар. Шай жиынтығы да ескерілген. Пойыздар құрамында міндетті түрде вагон-мейрамханалар жұмыс істейтін болады.
Қазіргі уақытта екі фирмалық:
1) «Астана-Алматы» қатынасындағы № 9/10;
2) «Атырау-Астана» қатынасындағы № 47/48 жолаушылар пойызы жұмыс істейді.
«Фирмалық» санатын теміржол көлігі саласындағы уәкілетті орган тексеру нәтижелері бойынша және Қазақстан Республикасының «Халыққа қызмет көрсету. Жолаушылар пойыздарында жолаушыларға қызмет көрсету. Жалпы талаптар» Ұлттық стандартына сәйкес тасымалдаушының ұсынуы бойынша пойызға береді.