ҚТЖ ауа-райының қолайсыздығына қарамастан штаттық режимде жұмыс істеуде
ҚТЖ-ның барлық құрылымдық бөлімшелері қар, боран және қатты желдің орын алу жағдайларында жүк пен жолаушыларды қауіпсіз тасымалдауды қамтамасыз етеді, деп хабарлайды Rail-news.kz.
Ауа райының қолайсыздығына байланысты «Жолаушылар тасымалы» АҚ қар құрсауында қалған адамдарды шығаруды ұйымдастырды. Ерейментау станциясынан әйелдер мен егде жастағы 40-тан астам адам Астанаға пойызбен жеткізілді. Сондай-ақ, елордадан Семей, Шымкент, Түркістан және Петропавл бағытында жүретін пойыздарға қосымша вагондарды тіркеу бойынша жедел шаралар қабылданды.
Пойыздардың өтуін қамтамасыз ету үшін тәулік бойы темір жолдарды қардан тазарту жұмыстары жүргізілуде. Қармен күреске бағытталған инфрақұрылымның барлық ресурстары жұмылдырылды. Магистральдық желінің Көкшетау, Қостанай, Павлодар, Қарағанды және Ақтөбе бөлімшелері аумақтарында темір жол төсемін қардан тазарту бойынша үздіксіз жұмыстар жүргізілуде. Өткен тәулікте арнайы қар тазалау техникасының көмегімен 430 шақырымнан астам теміржол төсемі тазартылды.