Семейде жолаушылар пойызының қозғалыс кестесіне өзгеріс енгізілді

Жазғы маусымға орай Семей теміржолы бойынша жолаушылар пойызының қозғалыс кестесіне өзгерістер енгізілді. Қайтадан әзірленген кестеде шартараптан ағылатын пойыздардың тораптық станциялардағы аялдау мерзімімен қатар, келу-кету уақыттары да біршама өзгерді.

Соның ішінде Семей станциясы бойынша ерекшелік басым. Атап айтсақ, №21-ші Семей-Қызылорда бағытындағы күнделікті қатынайтын жолаушылар пойызы ендігі аралықта түс әлеті ауа, яғни 13:38-де жолға шығатын болды. Сол тәрізді еліміз бойынша жолаушылар тасымалындағы ең ұзын маршрут саналатын, тақ күндері жолға шығатын, шығыс пен батысты жалғайтын №37-ші Семей-Маңғыстау пойызының уақыты 15:15-ке ауысты. Бұл өзгерістердің барлығы да сәуір айының 1-ші жұлдызынан бастап толықтай күшіне енді.  

Жаңа құрылған кесте Семей шаһарынан жұмыс бабымен сапар шегушілер үшін мейлінше тиімді болып тұр. Оның себебі, жолаушылар пойыздарының басым көпшілігі Алматыға да, Астана мен Ақтау қалаларына да таңертеңгі мезгілде ертемен жетеді екен.  

Сонымен қатар, халықаралық бағыттар саналатын, пандемиядан кейін қайта жанданған Новосібір – Бішкек, Новосібір – Алматы, Новосібір – Ташкент пойыздарының қозғалысында да қысқы мезгілмен салыстырғанда шамалы айырмашылықтар бар. Жалпы, өткен жылдан бастап Ресей мен Орта Азияны жалғайтын жолаушылар пойыздарының саны біршама артқан болатын.  

– Жолаушылар пойыздарының қатары алдағы уақыттарда әлі де қосыла түсетін болады. Қаламаңы тасымалына жататын Семей-Достық пен Өскемен-Достық бағытындағы жолаушылар пойызы жылдағы дәстүр бойынша туристік маусымның ашылуына орай жазғы мезгілде жолға шығарылады деп күтілуде, – дейді бұл орайда пікір білдірген Семей вокзалының басшылығы.  

Айта кетерлігі, қазіргі таңда Жаңа-Семей және Семей теміржол бекеттері бойынша жолаушылар нөпірі бұрынғы жылдармен салыстырғанда біршама артып отыр. Бүгінгі таңда Семей вокзалынан тәулігіне екі мыңның үстіндегі жолаушылар шартарапқа жол тартады екен.