Жазғы тасымалға дайындық қалай?

Жадыраған жаз маусымы келіп жетті. Теміржол көлігімен саяхаттаушылар қатары артып, жолаушы пойыздарына деген сұраныс күрт өсетін кезең.

Оқу жылы аяқталып, балалар каникулға, ата-аналары еңбек демалысына шығатын демалыс маусымы ұлттық тасымалдаушы – «Жолаушылар тасымалы» компаниясына үлкен жауапкершілік пен міндет жүктейді. Биылғы ахуал қандай, ұлттық тасымалдаушы тарапынан пойыздар құрамына дайындық жүргізу қай деңгейде?  

Бұл ретте «Жолаушылар тасымалы» АҚ жолаушы вагондарын жазғы тасымалға дайындау жұмыстарын толық аяқтағанын хабарлайды. Ұлттық тасымалдаушы биылғы жолаушылар тасымалына 2 мыңға жуық вагон дайындап отыр. Соның ішінде тек қана «Тальго» вагондарының саны 700-ден асады, стандарт типтегі вагондар 1,1 мыңды құраса, 108 вагон – электр дизельді пойыздардың вагоны. 1 маусымға дейін Ұлттық тасымалдаушының барлық вагондары жазғы жұмыстар үшін міндетті жоспарлы дайындықтан өтіп болады.  

Вагондардағы сумен жабдықтау жүйесінің дұрыс жұмыс істеп тұрғаны тексерілуде және электр жабдықтары да қаралып, жіті тексеруден өткізілуде, ауа желдеткіш және ауа баптау жүйесін қайта іске қосу бойынша жұмыстар жүзеге асырылуда. Вагондардың 80%-ға жуығы ауа баптау жүйесімен қамтамасыз етілген. 400 вагонда ауа баптағыштар зауытта құрастырылғанда қарастырылмаған. Мұндай вагондар түнгі уақытта қатынайтын пойыздарға қойылады.  

Одан бөлек вагондардың тамбурларын, жылыту жүйелері құбырларын әрлеу-сырлау жұмыстары жүргізілуде. Вагон шанақтарының сырты жуылып, әрбір рейс алдында құрам залалсыздандырылады, айына бір рет дезинсекция және дератизация жұмыстары жүргізіледі.  

Пойыз бригадалары жазғы уақыттағы тасымал жұмыстарының ерекшеліктеріне қарай арнайы нұсқаулықтан өтеді. «Жолаушылар тасымалы» АҚ биылғы жазғы маусымда 4,5 млн-ға жуық жолаушыны тасымалдауды жоспарлап отыр. Ал былтыр жыл бойы Қазақстан темір жолы арқылы 14 млн-нан астам жолаушы тасымалданған болса, жаз маусымындағы үлесі 4 млн құраған.  

Жазғы уақытта туристік маусымның басталуына орай ҚТЖ әйгілі демалыс орындарына қатынайтын бағдарларды дамытуға да ерекше көңіл бөліп отыр. ҚТЖ компаниясы «Қазақтуризм» ҰК» АҚ, «Атамекен» ҰКП және туристік сала өкілдерімен бірге жазғы жолаушылар тасымалын жеткілікті құраммен қамтамасыз ету мәселесі бойынша жиындар өткізеді.