Елімізде жыл сайын 13 миллионнан астам адам теміржол көлігі қызметін пайдаланады
«Қазақстан теміржолшысы» газетінің тілшісі
Жаз – адамдардың еңбек демалысына шығып, арлы-берлі ағылатын кезі. Бірі жайлы мезгілде басқа қалада тұратын тума-туыс, балаларын аралауға шықса, енді бірі шипажайға ем-дом алуға немесе саяхаттауға шығады. Қазақстанда жыл сайын 13 миллионнан астам адам теміржол көлігі қызметін пайдаланады екен.
Оның үстіне, соңғы жылдары елімізде ішкі туризм белсенді дамып келеді, ол біздің отандастарымыздың белгілі бір талғамы мен қалауына, дәлірек айтсақ, сапарлаудың қолжетімділігі мен жайлылығына байланысты қалыптаса бастады.
Сондықтан ұлттық тасымалдаушы сырт қалмай, елдің туристік әлеуетін дамыту процесіне белсенді араласуда. Бүгінгі таңда жолаушыларды теміржол көлігімен тасымалдауды 100-ден астам маршрут бойынша бірнеше тасымалдаушы жүзеге асырады, оның ішінде «ҚТЖ» ҰК» АҚ-ның еншілес компаниясы – «Жолаушылар тасымалы» АҚ шоқтығы биік.
Ұлттық тасымалдаушы мәртебесіне ие компания соңғы жылдары сервистік қызметті айтарлықтай дамытуда. Жолаушыға тек пойызбен шектелмей, ел ішінде жүріп-тұрудың оңтайлы маршрутын таңдауға мүмкіндік беретін «Интермодальды тасымалдау» жобасын дамыту компанияның басым міндеттерінің бірі болып табылады. «Жолаушылар тасымалы» АҚ тарапынан ұсынылып отырған төрт интермодальдық қызметтің бірі «Қайта отырғызып жеткізу» онлайн-сервисі. Ағымдағы жылдың басынан бері жолаушылар аталған жүйе арқылы 5 000 астам билет ресімдеді. Бұл жүйе ыңғайлы сапар ұсыну және уақытты үнемдеу мақсатында жолаушыға пойыздан пойызға ауыса отырып, межелі жерге дейін жол жүрудің мүмкін нұсқаларын таңдайды.
Екінші, «Перроннан үйге дейін» қызметі ІТ компаниясымен бірлесіп, яғни автобуспен Нұрлы жол вокзалынан үйге дейін жолаушылар трансфері ұйымдастырылды. Бұл қызметті әзірге 3/4 Алматы – Астана және 85/86 Шымкент – Астана пойызының жолаушылары пайдалана алады. Қызметті пайдалану үшін жолаушыға жолаушылар вагондарындағы QR кодын сканерлеу, қажетті мекен-жайды көрсету және қызметке ақы төлеу жеткілікті. Жолаушылардың барынша жайлылығы үшін автокөлік «Нұрлы жол» вокзалының ішіндегі №2 келу залында күтетін болады. Осы қызметтің шаттлдарымен 2100 астам жолаушы тасымалданды. Ал «Тапсырысты автобус» жаңа қызметіне жолаушылардың ұйымдастырылған тобы қызығушылық танытып отыр. Жоба Астана қаласына пойызбен қала маңындағы және қалааралық қатынаста, оның ішінде Бурабай, Зеренді, Баянауыл, Степногорск және т.б. бағыттарға келген жолаушылардың ұйымдасқан тобын тасымалдауды көздейді. Қызметке сілтеме бойынша тапсырыс беруге болады.
Соңғы «Тұрақты шаттл» қызметіне келсек, жоба «Қосшы қаласы – Нұрсұлтан Назарбаев халықаралық әуежайы – Нұрлы жол теміржол вокзал кешені» бағыты бойынша жолаушыларды шаттлмен күнделікті тасымалдауды көздейді. Тұрақты шаттл күн сайын таңғы сағат 08.30-да вокзалдан әуежайға және Қосшы қаласына; сағат 09.10-да әуежайдан Қосшы қаласына; сағат 16.30-да Қосшы қаласынан әуежай мен вокзалға; сағат 17.10-да әуежайдан вокзалға қатынайды. Жолаушыларға ыңғайлы болу үшін шаттл вокзал алдындағы алаңда, әуежайда тұрақтың бірінші желісінде және Қосшы қаласында «Әйгерім» СҮ» жылы аялдамасында күтеді.