Мүмкіндігі шектеулі жолаушылар үшін 35 арнайы вагон сатып алынады
«Қазақстан теміржолшысы» газетінің тілшісі
Қазақстан темір жолының жолаушы тасымалын әлемдік стандарт талаптарына сәйкестендірудің бір шарты мүмкіндігі шектеулі жолаушыларға жағдай жасау. Осы орайда алдағы уақытта 35 арнайы вагондар сатып алынбақ.
Бұл туралы ҚР Индустрия және инфрақұрылымдық даму министрлігі мәлімдеп отыр. Мүмкіндігі шектеулі жолаушыларды тасымалдауды қамтамасыз ету мақсатында министрлік ауқымды жұмыстарды жүргізуде. Атап айтқанда, 2025-2030 жылдар аралығында «Штадлер Казахстан» ЖШС-нен 537 вагон сатып алу жоспарлануда. Соның ішінде , жүк көтергіш механизмдермен жабдықталған мүгедектерге арналған вагондар саны – 35 бірлік. Вагондардың алғашқы легі, 6 вагон 2025 жылы, 2026 -2029 жылдар аралығында жыл сайын тағы да алты вагоннан 24 вагон болса, 2030 жылы 5 вагон сатып алынбақ. Ал қазіргі уақытта тасымалдаушылар тарапынан 37 бағыт бойынша қатынайтын пойыздарда мүмкіндігі шектеулі адамдарға арналған орындықтарымен бірге бар 80 вагон бар. Оның ішінде, «Тальго» вагондарында – 20 бірлік, стандартты пойыздарда – 60 бірлік. Осы вагондардың 28 бірлігі көтеру механизмімен жабдықтаса, 52 вагонда мұндай құрылғы жоқ.