Ұлттық тасымалдаушы жолаушылар пойыздарындағы «көмекшілерге» қарсы күресті күшейтуде

«Жолаушылар тасымалы» АҚ-да жолаушылардың билетсіз өтуіне және теміржол көлігімен ресімделмеген жүк багажын («көмекшілер», «отырғызушылар») тасымалдауға жәрдемдесетін делдалдардың заңсыз қызметінің жолын кесу мәселесі бойынша кеңес өтті.

Іс - шара Бас көлік прокуратурасымен, ҚР ИИДМ Көлік комитетімен, ҚР ІІМ көліктегі полиция департаментімен, «ҚТЖ» ҰК» АҚ Корпоративтік қауіпсіздік қызметімен, «Адал жол» жобалық кеңсесімен және «ҚТЖ» ҰК» АҚ – «Магистральдық желі дирекциясы» филиалымен бірлесіп ұйымдастырылды.

Кеңес қорытындысы бойынша «көмекшілердің» қызметін жою бойынша бірқатар шешімдер әзірленді. Атап айтқанда, жолаушыларда жол жүру құжаттарының болуын бақылау күшейтіліп, пойыздарда тексерулер саны артады.

Көлік полициясы нарядтарының сүйемелдеуімен жүретін пойыздар санын барынша көбейтеді. Теміржол вокзалдарында бейнебақылау камераларын орнату жұмыстары жалғасады, бұл жолаушыларға қауіпсіздіктің қосымша деңгейін береді.

Жолаушыларға қызмет көрсетуге байланысты қызметкерлердің лауазымдық нұсқаулықтары үшінші тұлғаларға билетсіз жол жүруге және ресімделмеген багажды тасымалдауға заңсыз көмек көрсеткені үшін жауапкершілікті қамтиды.

Естеріңізге сала кетейік, ҚР «Әкімшілік құқық бұзушылық туралы» Кодексінің 623-бабында жолаушыларды билетсіз тасымалдағаны үшін жауапкершілік нормасы қарастырылған:

1) халықаралық қатынас пойыздарында – жеті айлық есептік көрсеткіш мөлшерінде айыппұл;

2) республикаішілік қатынас пойыздарында – бес айлық есептік көрсеткіш мөлшерінде айыппұл салынады.

Сондай-ақ, 2020 жылдан бастап Қазақстанда билеттерді қайта сатқаны үшін айыппұл сомасы 100-ден 500 АЕК-ке дейін (265 мыңнан 1,3 млн теңгеге дейін) құрайды.