Оңтүстік филиалдағы оңды істер

«Жолаушылар тасымалы» АҚ «Оңтүстік» филиалы алты бағытта  жолаушылар тасымалын қамтамасыз етеді. Филиалдың паркінде 365 вагон бар. Жуырда мекеменің өндіріс алаңында болған біз мыңдаған адам еңбек ететін алып кәсіпорынның тыныс-тіршілігімен танысып, ондағы жасалып жатқан игілікті істерге куә болдық.  

Филиал директорының эксплуатация жөніндегі орынбасары Нұртуған Жүсіповті Алматы-2 станциясында жолықтырдық. Оңтүстік филиалында барлығы 1800 адам еңбек етсе, соның 980-і жолсеріктер екен, олар 30 бригадаға бөлініп жұмыс істейді. Осындай алып ұжымды басқарып отырған басшылардың бірі Жүсіпов бізді өндіріс орнымен таныстырып, бүгінде жасалып жатқан жұмыстар ретін баяндады.    

– Біздің жолсеріктер Алматы – Маңғыстау, Алматы – Саратов, Алматы – Новосибирск, Алматы – Өскемен, Алматы – Қазан, Алматы – Сарыағаш бағыттарында жолаушылар пойыздарында халыққа қызмет көрсетеді. 121 жаңа вагон біздікі, қалған ескілерін «Вагонсервис» АҚ-дан алып отырмыз. Келесі жылы біздің компания Оңтүстік филиалының паркін тағы да жаңартуды жоспарлап отыр. Әзірге қолдағы жаңа вагондарымыз Алматыдан Маңғыстауға және Өскеменге қатынайтын пойыздарға қойылған. Бұған дейін техникалық ақауларға және себепсіз кешігуге жол берілген жоқ, – дейді Н. Жүсіпов.    

Біз барғанда филиал вагондары ТО-2 тексеруінен, яғни маусымдық техникалық қызмет көрсетуден шығып жатыр екен. Жалпы жолаушылар вагондары барлық жерде бірдей жылына екі рет осы қызмет түрінен өтеді, көктемде жазға, күзде қысқа дайындық жүргізіледі. Дәл қазіргі сәтте қысқа дайындау кезінде жылыту жүйелері тазартылып, терезелері бекітіліп, қатал маусымда жұмыс істеуге сақадай сай дайындықпен жолға шығарылуда.    

Филиалдың сервис бойынша сектор бастығы Гүлмира Жалелова жолсеріктердің сервистік қызмет көрсетуіне жауапты. Жолсеріктерді оқытуда тақырыптық жоспар бекітіліп, жыл бойына олар сол бойынша оқытылады. Әр бригада техникалық кабинетте өтетін сабақтарға қатысады. Жолсеріктер сонымен қатар, әр рейс алдында нұсқаулықпен танысып, медициналық тексеруден, үш жыл сайын аттестациядан өтеді.  

– Бүгінде баяғыдай емес, әр жолсерікке формасы өздеріне шақтап жеке тігіледі. Бірінікін бірі ауыстырып кимейді. Костюмдері  екі жылдық мерзімге киюге шақталған. Іші жылы плащтарды үш жыл киеді. Шарф, қолғаппен де компания қамтамасыз етеді. Жалпы, соңғы кезде жолсеріктер формасы, арнайы киімге қатысты мәселе жоқ. Ұлттық компания имиджіне жұмыс істейтін болған соң жолаушы халыққа жоғары сервистік қызмет көрсетіп, ал жолсеріктердің соған лайық болғанына біздің компания да мүдделі, – дейді сектор бастығы.  

Оған қайтар жолда көз жеткіздік. Оңтүстік филиалының жолсеріктері жолаушыларды жылы жүзбен қарсы алып, орындарына жайғастырып жатты.  Вагонға кіріп жайғасқан соң қандай қызмет түрлерін пайдалануға болатынын айтып, ақпарат берді. Фирмалық, жүрдек пойыздарда төсек жаймасын да жолсеріктер өздері салып дайындап қояды. Тәулік бойына ыстық су, ауыз су мен техникалық су үздіксіз беріп тұрды. Жол бойына вагон іші бірнеше рет тазаланды. Кешенді  тазалық жұмыстары вагондар құрастырылатын станцияда жүргізіледі екен.